কোকৰাঝাৰ জিলাৰ অতিৰিক্ত উপায়ুক্ত দেৱেশ্বৰ বৰাৰ বিৰুদ্ধে উত্থাপিত হৈছে এক গুৰুতৰ অভিযোগ।
এগৰাকী বিবাহিত মহিলাই অতিৰিক্ত উপায়ুক্তগৰাকীৰ বিৰুদ্ধে যৌন নিৰ্যাতনৰ অভিযোগ উত্থাপন কৰি আৰক্ষীৰ কাষ চাপিছে।
সোমবাৰে বিবাহিত মহিলাগৰাকীয়ে জিলাখনৰ অতিৰিক্ত উপায়ুক্ত দেৱেশ্বৰ বৰাৰ বিৰুদ্ধে যৌন নিৰ্যাতন চলোৱাৰ অবিযোগ তুলি কোকৰাঝাৰ আৰক্ষী থানাত এজাহাৰ দাখিল কৰে।
ঘটনাৰ বিৱৰণীৰ মতে এগৰাকী সন্তানৰ মাতৃগৰাকীয়ে যোৱা ২২ নৱেম্বৰত ভূমি বিবাদ নিষ্পত্তিৰ কামত জিলাখনৰ অতিৰিক্ত উপায়ুক্ত বৰাক সাক্ষাৎ কৰাৰ সময়তে উক্ত কাণ্ডটো সংঘটিত কৰা বুলি জানিবলৈ দিয়ে।
অভিযুক্তকাৰী মহিলাগৰাকীৰ মতে স্বামীয়ে বিশেষ কামত গুৱাহাটীলৈ যাব লগা হোৱাত মহিলাগৰাকীয়ে অকলে অতিৰিক্ত উপায়ুক্ত বৰাক চৰকাৰী আৱাসগৃহত সাক্ষাৎ কৰিছিল।
সাংবাদিকৰ আগত মহিলাগৰাকীয়ে কয় যে ঘৰত কোনো নথকাৰ সুযোগ গ্ৰহণ কৰি অতিৰিক্তি উপায়ুক্তগৰাকীয়ে তেওঁক বিচনাত একেলগে শোৱাৰ প্ৰস্তাৱ দিয়ে।
মহিলাগৰাকীয়ে সেই প্ৰস্তাৱ অস্বীকাৰ কৰি কিয় তেনে প্ৰস্তাৱ দিয়া হৈছ বুলি প্ৰশ্ন কৰাত অতিৰিক্ত উপায়ুক্ত গৰাকীয়ে সোঁহাতত ধৰি টানি তেওঁ ভাবুকি প্ৰদান কৰে বুলি জানিবলৈ দিয়ে।
কোনো মতে অতিৰিক্ত উপায়ুক্তগৰাকীৰ গৃহৰ পৰা নিজক ৰক্ষা কৰি উলাই অহা বুলি উল্লেখ কৰি মহিলা গৰাকীয়ে সাংবাদিকৰ আগত কয় যে ইতিমধ্যে তেওঁ অসম মহিলা আয়োগতো ঘটনা সন্দৰ্ভত অভিযোগ দাখিল কৰিছে।
ইপিনে অভিযুক্ত উপায়ুক্ত গৰাকীয়ে এই অভিযোগ ভুৱা বুলি দাবী কৰি অভিযোগকাৰী মহিলাগৰাকীৰ বিৰুদ্ধে কোকৰাঝাৰ আৰক্ষী থানাত এজাহাৰ দাখিল কৰা বুলি জানিব পৰা গৈছে।
