নৱ গঠিত আঞ্চলিক ৰাজনৈতিক দল ৰাইজৰ দলৰ ৮৩ নং ধিং বিধান সভা সমষ্টিৰ সমষ্টি কমিটি গঠন কৰাৰ উদ্দেশ্যে আজি ধিঙৰ ৰত্ন ভৱনত দলৰ ৰাজ্যিক আহ্বায়ক ৰুবুল দাসৰ সভাপতিত্বত এখন সভা অনুষ্ঠিত হয়।
সভাত কৃষক মুক্তি সংগ্ৰাম সমিতিৰ সভাপতি ৰাজু বৰাই কয়, ‘সাম্প্ৰদায়িক ৰাষ্ট্ৰীয়তাবাদী শক্তি বিজেপিক উৎখাত কৰি অসমত এক প্ৰগতিশীল আঞ্চলিক শক্তি প্ৰতিষ্ঠা কৰিব লাগিব’।
‘এই লক্ষ্যৰে ৰাইজৰ দলে অসমত সাংগঠনিক কাম কাজ আৰম্ভ কৰাৰ লগতে অসমত থকা জাতীয় চেতনা সম্পন্ন আঞ্চলিক শক্তি সমূহক একত্ৰিত কৰাৰ প্ৰয়াস কৰা হৈছে’। এই আঞ্চলিক শক্তিয়েহে অসমক সুৰক্ষিত কৰিব পাৰি’, এইদৰে কয়।
অখিল গগৈৰ প্ৰসংগ উল্লেখ কৰি ৰাজু বৰাই লগতে কয়, ‘অখিল গগৈক বিজেপি চৰকাৰে ভয় কৰিছে। যাৰ বাবে অখিল আক্ৰোশ আৰু ষড়যন্ত্ৰমূলক ভাৱে কাৰাবন্দি কৰি ২০২১ চনৰ নিৰ্বাচনী বৈতৰণী পাৰ কৰিব বিচাৰিছে। বিজেপিৰ এই ষড়যন্ত্ৰ সফল কৰিবলৈ দিয়া নহ’ব। বিজেপিৰ যদি সাহস আছে অখিল গগৈক মুক্তি দি নিৰ্বাচন খেলক।
প্ৰসংগ ক্ৰমে তেওঁ বিজেপি দলক কঠোৰ সমালোচনা কৰি ২০২১ ৰ নিৰ্বাচনত দলটোক পুলিয়ে পোখাই উভালি ব্ৰহ্মপুত্ৰত পেলাই দিয়া হ’ব বুলিও মন্তব্য কৰে।
উল্লেখ্য যে আজি কেইবা শতাধিক ৰাইজৰ উপস্থিতিত এখন ৪৪ জনীয়া সমষ্টি কমিটি গঠন কৰা হয়।
সেই মৰ্মে ডাঃ ৰিয়াজ উদ্দিন আহমেদক সভাপতি, জাহাঙ্গীৰ হুছেইনক কাৰ্যকৰী সভাপতি, ছফিউল্লা আৰু জাহাঙ্গীৰ হুছেইনক উপ-সভাপতি, আবুল কালাম আজাদক সাধাৰণ সম্পাদক(প্ৰশাসনিক), ৰফিকুল ইছলাম, ফাইজুৰ ৰহমান, মজিবুৰ ৰহমানসহ পাঁচ জনক সাধাৰণ সম্পাদক, নেকিবুৰ ৰহমান হাজৰিকা, দুৰ্গেশ্বৰ দাস আৰু আতিকুল ইছলামক জিলা প্ৰতিনিধি, মাইনুদ্দিন আহমেদ, অধিবক্তা আজাদ হুছেইন ছিদ্দিকি, নজৰুল হক তালুকদাৰক উপদেষ্টা হিচাপে লৈ এই সমিতিখন গঠন কৰা হয়।
