ফ্ৰান্সৰ পিছত এতিয়া ব্ৰাজিলত জেন জি ছাত্ৰ-ছাত্ৰীৰ প্ৰতিবাদ। ৰাজধানী ৰিঅ’ ডি জেনেইৰ’ত ৰাজপথলৈ ওলাই আহি ৰাষ্ট্ৰপতি পদৰ প্ৰাৰ্থী ফ্লেভিঅ’ বলছ’নাৰোৰ বিৰুদ্ধে প্ৰতিবাদ সাব্যস্ত কৰিছে হাজাৰ হাজাৰ লোকে। ব্ৰাজিলত সোঁপন্থী মতাদৰ্শৰ প্ৰভাৱ বাঢ়িছে। ইয়াৰ বিৰুদ্ধে ক্ষোভ প্ৰকাশ কৰিছে জেন জি-য়ে।
কিছুদিন পূৰ্বে দেশৰ ৰাষ্ট্ৰপতি নিৰ্বাচনৰ প্ৰথম ৰাউণ্ডত সোঁপন্থী চিনেটৰ ফ্লেভিঅ’ বলছ’নাৰোৱে সৰ্বাধিক ভোট লাভ কৰিছিল। তেওঁ প্ৰাক্তন ৰাষ্ট্ৰপতি জেইৰ বলছ’নাৰোৰ পুত্ৰ। দুৰ্নীতিৰ অভিযোগত জেইলত আছে বলছনাৰো। প্ৰথম ৰাউণ্ডৰ নিৰ্বাচনত ৪৭ শতাংশ ভোট লাভ কৰে ফ্লেভিঅ’ বলছ’নাৰ’ই। তেওঁৰ ঘনিষ্ঠ প্ৰতিদ্বন্দ্বী বৰ্তমানৰ বাওঁপন্থী ৰাষ্ট্ৰপতি লুইজ ইনাচিঅ’ লুলা দা চিলভাই ৪৫ শতাংশ ভোট লাভ কৰে।
কিন্তু ৰাষ্ট্ৰপতি নিৰ্বাচনত জয়ী হ’বলৈ প্ৰয়োজনীয় ৫০ শতাংশ ভোট লাভ কৰা নাই কোনো প্ৰাৰ্থীয়ে। ফলত ২৫ অক্টোবৰত পুনৰ মুখামুখি হ’ব বলছ’নাৰো আৰু লুলাৰ। এই দৌৰত বলছ’নাৰোৰ জয়ৰ সম্ভাৱনা বেছি বুলি ধাৰণা কৰা হৈছে।
ডয়চে ৱেলৰ এক প্ৰতিবেদন অনুসৰি ২০ বছৰীয়া সাহিত্যৰ ছাত্ৰ জোয়াও ভিক্টৰ ভিয়েৰাই কয় যে, “যদি বলছ’নাৰো জয়ী হয় তেন্তে ব্ৰাজিল আমেৰিকাৰ উপনিবেশত পৰিণত হ’ব।” তেওঁৰ এই বক্তব্যই ব্ৰাজিলৰ বাওঁপন্থী শিবিৰৰ এটা অংশৰ মাজত আশংকাৰ সৃষ্টি কৰিছে। তেওঁলোকৰ মতে বলছনাৰোৰ ৰাজনৈতিক স্থিতি আমেৰিকাৰ ৰাষ্ট্ৰপতি ড’নাল্ড ট্ৰাম্পৰ মতাদৰ্শৰ সৈতে যথেষ্ট মিল আছে।
আল জাজিৰাৰ এক প্ৰতিবেদন অনুসৰি ৰাষ্ট্ৰপতি নিৰ্বাচনৰ প্ৰথম ৰাউণ্ডৰ ফলাফল ঘোষণা হোৱাৰ পিছত লেটিন আমেৰিকাৰ আন এখন দেশৰ ক্ষমতা বাওঁপন্থী নেতৃত্বৰ হাতৰ পৰা সোঁপন্থী নেতৃত্বৰ হাতলৈ যাব পাৰে বুলি আশংকা কৰা হৈছে। তাৰ শংকাত প্ৰতিবাদকাৰীয়ে ৰিঅ’ ডি জেনেইৰ’ৰ মাজমজিয়াত সমদল উলিয়ায়।
প্ৰতিবাদকাৰীসকলৰ হাতত থকা পোষ্টাৰত লিখা আছিল, “বলছ’নাৰো কেতিয়াও নহয়” আৰু “পিতৃও নহয়, পুত্ৰও নহয়।” কিছুমান বেনাৰত লিখা আছিল, “কেতিয়াও একনায়কত্ববাদ নহ’ব” আৰু “বলছ’নাৰো আঁতৰি যোৱা”।
সামুদ্ৰিক জাহাজ কোম্পানী এটাৰ প্ৰশাসনিক কৰ্মী ২৫ বছৰীয়া এলিছ কাৰ্নেইৰ’ই কয় যে, “মই গণতন্ত্ৰত বিশ্বাস কৰোঁ। সেইবাবেই মই এই আন্দোলনত যোগদান কৰিলোঁ। মইও ভয় খাইছো। যদি সোঁপন্থী চৰকাৰ এখন ক্ষমতালৈ আহে তেন্তে আমাৰ বাবে পৰিস্থিতি আৰু বেয়া হ’ব পাৰে।”
ব্ৰাজিলৰ সোঁপন্থীৰ সমালোচকসকলে কয় যে জেইৰ বলছ’নাৰোৰ এই কাৰ্যই দেশখনৰ গণতন্ত্ৰৰ প্ৰতি ভাবুকি কঢ়িয়াই আনিছে। ৰাষ্ট্ৰপতি পদৰ প্ৰাৰ্থী চিনেটৰ ফ্লেভিঅ’ বলছ’নাৰোৱে পিতৃৰ সমৰ্থন লাভ কৰিছে। আনকি তেওঁ পিতৃক ক্ষমা কৰাৰ পোষকতাও কৰিছে। এই স্থিতিয়ে প্ৰতিবাদকাৰীক আৰু অধিক শংকিত কৰি তুলিছে।
বিশ্ববিদ্যালয়ত প্ৰৱেশ পৰীক্ষাৰ বাবে প্ৰস্তুতি চলাই থকা ১৯ বছৰীয়া ইমানুৱেল আৰাউজোৱে কয় যে ব্ৰাজিলত সোঁপন্থী মতাদৰ্শ আৰু বলছ’নাৰোবাদৰ উত্থানত আমি বিৰক্ত হৈছো। আমাক ইয়াৰ সমাধানৰ প্ৰয়োজন।
ব্ৰাজিলে এতিয়া ২৫ অক্টোবৰৰ বাবে অপেক্ষা কৰি আছে, যেতিয়া দেশখনৰ পৰৱৰ্তী ৰাষ্ট্ৰপতি হ’বলৈ দ্বিতীয় ৰাউণ্ডৰ নিৰ্বাচনত মুখামুখি হ’ব লুলা দা ছিলভা আৰু ফ্লেভিঅ’ বলছ’নাৰো।
