ঋণ লৈ আদায় নিদি পলাই থকা সুৰা সম্ৰাট বিজয় মালিয়াৰ পুনৰ সংকট বৃদ্ধি পাইছে। এনফৰ্ছমেন্ট ডাইৰেক্টৰেট বা ইডিয়ে ফ্ৰান্সৰ পৰা সুৰা সম্ৰাটগৰাকীৰ ১৬লাখ য়ুৰো অৰ্থাৎ ভাৰতীয় মুদ্ৰাত প্ৰায় ১৪কোটি টকাতকৈয়ো অধিক পৰিমানৰ সম্পত্তি বাজেয়াপ্ত কৰে। ইডিৰ এক বিবৃতিত এই কথা প্ৰকাশ কৰা হৈছে।
বিবৃতি অনুসৰি,’’ইডিৰ অনুৰোধৰ পাছত ফ্ৰান্স প্ৰশাসনে ফ্ৰান্সৰ ৩২এভিনিউ, FOCH-ত থকা বিজয় মালিয়াৰ সম্পত্তি বাজেয়াপ্ত কৰিছে। বাজেয়াপ্ত কৰা সম্পত্তিৰ পৰিমান ভাৰতীয় মুদ্ৰাত প্ৰায় চাৰে চৈধ্য কোটি টকা। তদন্তত ধৰা পৰিছিল যে এক বৃহৎ পৰিমানৰ ধন কিংফিচাৰ বিমান সংস্থাৰ একাউন্টৰ পৰা বিদেশলৈ প্ৰেৰণ কৰা হৈছিল।‘’
ইডিয়ে এক টুইটৰ যোগেও এই কথা সদৰী কৰিছে।
বৃহৎ পৰিমানৰ ঋণ লৈ পৰিশোধ নকৰি পলাই থকা বিজয় মালিয়াক বিচাৰৰ বাবে ভাৰতলৈ ঘুৰাই অনাৰ বাবে দীৰ্ঘদিন ধৰি প্ৰচেষ্টা অব্যাহত ৰখা হৈছে।
ED seizes asset worth 1.6 Million Euros through French authority located at 32 Avenue FOCH, France of Vijay Mallya under PMLA in a #BankFraudCase
— ED (@dir_ed) December 4, 2020
মালিয়াই ৯ হাজাৰ কোটি টকাৰ ঋণ অনাদায়য়ৰ গোচৰত ২০১৬চনৰ মাৰ্চত দেশ এৰি পলায়ন কৰিছিল। ইয়াৰ পাছৰে পৰা তেওঁ ব্ৰিটেইনত আছে।
ব্ৰিটেইনৰ আদালতে মালিয়াক দেশলৈ ঘুৰি যোৱাৰ নিৰ্দেশ দিছে যদিও কিছু আইনী জটিলতাৰ বাবে তেওঁক ভাৰতে এতিয়াও ঘুৰাই আনিব পৰা নাই।
