এগৰাকী ৩৫ বছৰীয়া ৫ সন্তানৰ মাতৃক ১৭ জনকৈ লোকে গণধৰ্ষণ কৰাৰ এক পাশৱিক ঘটনা পোৰহলৈ আহিছে।
ঘটনাটো সংঘটিত হৈছে ঝাৰখণ্ডৰ দুমকা জিলাৰ মুফাচচিল থানাৰ অন্তৰ্গত এক এলেকাত।
আৰক্ষী সূত্ৰই প্ৰকাশ কৰা ঘটনাৰ বিৱৰণীৰ মতে যোৱা মংগলবাৰে ৰাতি স্বামীৰ সৈতে বজাৰৰ পৰা ওভতি অহাৰ সময়তে সংঘটিত হয় গণধৰ্ষণ কাণ্ডটো।
স্থানীয় বজাৰৰ পৰা স্বামীৰ সৈতে ঘৰলৈ ওভতি আহি থকাৰ সময়তে ১৭ জন লোকে স্বামীক বান্ধি লৈ মহিলাগৰাকীক ধৰ্ষণ কৰে। লোককেইজনে মহিলাগৰাকীৰ স্বামীৰ ওপৰতো নিৰ্যাতন চলোৱা বুলি প্ৰকাশ কৰিছে আৰক্ষীয়ে।
“মহিলাগৰাকীৰ জবানবন্দীৰ মতে ৰাতি বজাৰৰ পৰা ওভতি অহাৰ সময়তে অভিযুক্তকেইজনে এই ঘটনাটো সংঘটিত কৰে। মহিলাগৰাকীৰ স্বামীক বন্দী কৰি অভিযুক্তকেইজনে আক্ৰমণো কৰে।” ডিআইজি সুদৰ্শন মণ্ডলে সংবাদ মাধ্যমৰ আগত কয়।
আৰক্ষী সূত্ৰই প্ৰকাশ কৰা মতে বুধবাৰে মহিলাগৰাকীয়ে আৰক্ষী থানাত উপস্থিত হৈ অভিযোগ দাখিল কৰিছে। অভিযোগ লাভ কৰাৰ পিছতে আৰক্ষীয়ে অভিযুক্তৰ সন্ধানত অভিযান আৰম্ভ কৰিছে। আৰক্ষীয়ে ইতিমধ্যে এজন লোকক চিনাক্ত কৰি আটক কৰিবলৈ সক্ষম হৈছে।
নিৰ্যাতিতা মহিলাগৰাকীৰ স্বাস্থ্য পৰীক্ষা কৰোৱা হৈছে বুলিও প্ৰকাশ কৰিছে আৰক্ষীয়ে।
আনহাতে আৰক্ষীয়ে অভিযোগ লাভ কৰিলেও ঘটনাটোৰ তদন্ত অতি সতৰ্কতাৰে আৰম্ভ কৰা বুলি জনাইছে। মহিলাগকাৰীৰ জবানবন্দীত অসংগতি আছে বুলি প্ৰকাশ কৰিছে আৰক্ষীয়ে।
“আমি গাঁওবাসীক ধৰি ধৰি এই সম্পৰ্কে প্ৰশ্ন কৰিছো। মহিলাগৰাকীয়ে জবানবন্দী সলাইছে। তেওঁলোকৰ গাঁৱলৈ গৈ প্ৰশ্ন কৰোতে পাঁচজন লোকে গণধৰ্ষণ কৰা বুলি প্ৰকাশ কৰিছে মহিলাগৰাকীয়ে।” ডিআইজি মণ্ডলে সংবাদ মাধ্যমৰ আগত কয়।
