বিমান বন্দৰৰ টাৰ্মিনেল নিৰ্মাণৰ বাবে শ্ৰমিকে খান্দি আছিল মাটি।
কিন্তু মাটি খান্দি থাকোতেই কেইজনমান শ্ৰমিকে মাটিৰ তলৰ পৰা উদ্ধাৰ কৰে এবিধ বিশেষ সামগ্ৰী।
প্ৰথমে কৌতূহলবশতঃ সামগ্ৰী বিধ হাতেৰে ডাঙি ওপৰলৈ তুলি অনাৰ চেষ্টা চলাইছিল এজন শ্ৰমিকে।
কিন্তু সামগ্ৰী বিধৰ ওজন বহু বেছি হোৱা বাবে সফল নহ’ল।
পিছত যেনিবা বহু কেইজন শ্ৰমিকে মিলি সামগ্ৰী বিধ ওপৰলৈ তুলি আনে।বাংলাদেশৰ ৰাজধানী ঢ়াকাৰ হজৰত শ্বাহজালাল আন্তঃৰাষ্ট্ৰীয় বিমান বন্দৰৰ তৃতীয় টাৰ্মিনেল নিৰ্মাণৰ বাবে মাটি খান্দি থকাৰ সময়তে সেই বস্তুবিধ উদ্ধাৰ হয়।
বিমান বন্দৰ কৰ্তৃপক্ষই সেয়া চিলিণ্ডাৰৰ আকৃতিৰ এটা বিশাল বোমা বুলি নিশ্চিত হোৱাৰ পিছতে বোমা নিষ্ক্ৰিয় কৰা বাহিনীক খবৰ দিয়া হয়।বোমাটোৰ ওজন ২৫০ কিলোগ্ৰাম বুলিও নিশ্চিত কৰা হয় ।
ইয়াৰ পিছতে ঢ়াকাৰ ৰচুল বিমান ঘাটিলৈ বোমাটো নিয়া হয় আৰু তাতেই বায়ুসেনা বাহিনীয়ে বোমাটো নিষ্ক্ৰিয় কৰে।
বাংলাদেশৰ বায়ুসেনা বাহিনীৰ এগৰাকী বিষয়াই প্ৰকাশ কৰা মতে বোমাটো ১৯৭২ চনৰ বাংলাদেশ মুক্তি সংগ্ৰামৰ সময়ত নিক্ষেপ কৰা নুফুটা বোমা হ’ব পাৰে।
বোমাটো বিশ্বযুদ্ধৰ সময়ৰ হ’ব পাৰে বুলিও বহুতে সন্দেহ কৰিছে।
অৱশ্যে সঠিক পৰ্যবেক্ষণৰ পিছতহে কথাবোৰ স্পষ্ট হ’ব।
