শিৱসাগৰত সদ্যপ্ৰয়াত প্ৰাক্তন মুখ্যমন্ত্ৰী তৰুণ গগৈক ৰাজহুৱা শ্ৰদ্ধাঞ্জলি জ্ঞাপন কৰা হয়।
শিৱসাগৰৰ দ’লমুখ চাৰিআলিস্থিত ভাৰতৰত্ন ড০ ভূপেন হাজৰিকাৰ প্ৰতিমূৰ্তিৰ সন্মুখত অনুষ্ঠিত হয় এই শ্ৰদ্ধাঞ্জলি অনুষ্ঠানৰ।
সদ্যপ্ৰয়াত প্ৰাক্তন মুখ্যমন্ত্ৰীগৰাকীৰ স্মৃতিত সমগ্ৰ অসমত পৰিভ্ৰমণ কৰা শান্তি সদভাৱনা যাত্ৰা আজি শিৱসাগৰত উপস্থিত হয়।
জননেতা তৰুণ গগৈৰ চিতাভষ্ম শিৱসাগৰত উপস্থিত হোৱাৰ পিছতেই তেওঁৰ চিতাভষ্মত শিৱসাগৰবাসীয়ে শ্ৰদ্ধাঞ্জলি জনায়।
শ্ৰদ্ধাঞ্জলি অনুষ্ঠানৰ লগতে প্ৰাক্তন মুখ্যমন্ত্ৰী তৰুণ গগৈৰ আত্মাৰ সদগতি কামনা কৰি নাম প্ৰসঙ্গ আৰু সৰ্বধৰ্মীয় প্ৰাৰ্থনা কৰা হয়।
জাতি-ধৰ্ম-বৰ্ণ-ভাষা নিৰ্বিশেষে সকলো স্তৰৰ লোকে শিৱসাগৰত শেষ শ্ৰদ্ধা জনায় সকলোৰে প্ৰিয় নেতাগৰাকীক।
শ্ৰদ্ধাঞ্জলি অনুষ্ঠানত পুত্ৰ গৌৰৱ গগৈ, বিৰোধী দলৰ দলপতি দেৱব্ৰত শইকীয়া, প্ৰাক্তন মন্ত্ৰী শৰৎ বৰকটকী, প্ৰণতি ফুকন, প্ৰাক্তন বিধায়ক সুশান্ত বৰগোঁহাইকে ধৰি বহু সংখ্যক কংগ্ৰেছ কৰ্মী উপস্থিত থাকে।
শ্ৰদ্ধাঞ্জলি অনুষ্ঠানৰ পিছত তেওঁৰ চিতাভষ্ম সমগ্ৰ শিৱসাগৰ চহৰ পৰিভ্ৰমণ কৰি দিখৌ নদীৰ ঘাটলৈ নিয়া হয়। দিখৌ নদীৰ ঘাটত বৈদিক নিয়ম নীতিৰে সদ্যপ্ৰয়াত মুখ্যমন্ত্ৰী গৰাকীৰ চিতাভষ্ম শিৱসাগৰৰ দিখৌ নদীত বিসৰ্জন দিয়ে পুত্ৰ গৌৰৱ গগৈয়ে।
পিছত শান্তি সদভাৱনা যাত্ৰা চৰাইদেউ জিলালৈ যাত্ৰা কৰে।
