আই চি চিয়ে শেহতীয়াভাৱে টেষ্ট বেটছমেনৰ নতুন ৰেংকিং ঘোষণা কৰিছে।
শেহতীয়াভাৱে ঘোষণা কৰা আই চি চিৰ টেষ্ট বেটছমেনৰ তালিকা অনুসৰি অষ্ট্ৰেলিয়াৰ প্ৰাক্তন টেষ্ট অধিনায়ক ষ্টিভেন স্মিথে ৯১১ পইণ্টেৰে শীৰ্ষত থকাৰ বিপৰীতে ভাৰতীয় ক্ৰিকেট দলৰ অধিনায়ক বিৰাট কোহলীয়ে ৮৮৬ পইণ্টেৰে দ্বিতীয় স্থানত আছে।
নিউজিলেণ্ডৰ অধিনায়ক কানে উইলিয়ামছে এটা স্থান অৱনমিত হৈ ৮৭৭ পইণ্টেৰে তৃতীয় স্থানত আছে।
অষ্ট্ৰেলিয়াৰ আন এগৰাকী যুৱ বেটছমেন মাৰ্নাছ লাবুছানে চতুৰ্থ, পাকিস্তানৰ বাবৰ আজমে পঞ্চম স্থান অধিকাৰ কৰি আছে।
অষ্ট্ৰেলিয়াৰ অপেনাৰ ডেভিড ৱাৰ্ণাৰে ষষ্ঠ, ভাৰতৰ নিৰ্ভৰযোগ্য মিডল অৰ্ডাৰ বেটছমেন চেতেশ্বৰ পূজাৰাই সপ্তম, ইংলেণ্ডৰ বেন ষ্টোক, জো ৰুটে ক্ৰমে অষ্টম আৰু নৱম স্থান দখল কৰি থকাৰ লগতে আজিংক ৰাহানে দশম স্থানত আছে।
অষ্ট্ৰেলিয়া আৰু ভাৰতৰ মাজত বহু চৰ্চিত টেষ্ট শৃংখলা আৰম্ভ হোৱাৰ পূৰ্বে আই চি চিয়ে ঘোষণা কৰা শেহতীয়া টেষ্টৰ বেটছমেনৰ ৰেংকিঙত অষ্ট্ৰেলিয়াৰ তিনিগৰাকী আৰু ভাৰতৰ তিনিগৰাকী বেটছমেনে স্থান অধিকাৰ কৰাক লৈ শৃংখলাটো প্ৰতিদ্বন্দ্বিতাপূৰ্ণ হোৱা ইংগিত দিছে।
