চৰকাৰী বিষয়া বা আৰক্ষীৰ বিৰুদ্ধে উত্থাপিত উৎকোচ দাবীৰ অভিযোগৰ তদন্ত কৰিবলৈ কোনো আগতীয়া অনুমোদন বা পূৰ্বানুমতিৰ প্ৰয়োজন নাই বুলি উচ্চতম ন্যায়ালয়ে এক গুৰুত্বপূৰ্ণ ৰায় প্ৰদান কৰিছে। যোৱা ১৬ অক্টোবৰত ন্যায়াধীশ এছ ভি এন ভাট্টি আৰু ন্যায়াধীশ এন ভি আঞ্জাৰিয়াৰ খণ্ডপীঠে দুৰ্নীতি নিবাৰক আইনৰ অধীনত ৰাজস্থানৰ এজন আৰক্ষী কনিষ্টবলৰ আবেদন খাৰিজ কৰি এই তাৎপৰ্যপূৰ্ণ পৰ্যবেক্ষণ আগবঢ়ায়। সৰ্বোচ্চ ন্যায়ালয়ে স্পষ্ট কৰি দিয়ে যে উৎকোচ গ্ৰহণ কৰাটো কেতিয়াও চৰকাৰী কৰ্তব্য পালনৰ অংশ হ’ব নোৱাৰে, সেয়েহে এনে অভিযোগৰ তদন্তৰ ক্ষেত্ৰত আইনে প্ৰদান কৰা সুৰক্ষা প্ৰযোজ্য নহ’ব।
খণ্ডপীঠৰ হৈ ৰায়দান লিখি ন্যায়াধীশ আঞ্জাৰিয়াই ৰাজস্থান উচ্চ ন্যায়ালয়ৰ পূৰ্বৰ সিদ্ধান্তক বাহাল ৰাখে, য’ত তেজৰাম নামৰ আৰক্ষী কনিষ্টবলজনৰ বিৰুদ্ধে দুৰ্নীতি নিবাৰক আইনৰ ৭ নং ধাৰাৰ অধীনত অভিযোগ গঠন কৰা হৈছিল। উল্লেখ্য যে ২০১৮ চনত সংশোধিত দুৰ্নীতি নিবাৰক আইনৰ ৭ নং ধাৰা অনুসৰি, চৰকাৰী কৰ্তব্য পালনৰ নামত অসৎ উপায়েৰে কোনো সুবিধা গ্ৰহণ কৰা বা গ্ৰহণৰ চেষ্টা কৰা চৰকাৰী বিষয়াক শাস্তি প্ৰদানৰ বিধান আছে। কনিষ্টবলগৰাকীয়ে যুক্তি দৰ্শাইছিল যে আইনখনৰ ১৭(এ) ধাৰা অনুসৰি তেওঁৰ বিৰুদ্ধে তদন্ত আৰম্ভ কৰাৰ পূৰ্বে কৰ্তৃপক্ষৰ পৰা আগতীয়া অনুমোদন লোৱা হোৱা নাছিল। কিন্তু সৰ্বোচ্চ ন্যায়ালয়ে এই যুক্তি খণ্ডন কৰি কয় যে ধন আত্মসাৎ, হিচাপৰ জালিয়াতি, প্ৰৱঞ্চনা, অপৰাধমূলক বিশ্বাসঘাটকতা আৰু উৎকোচ গ্ৰহণৰ দৰে অপৰাধসমূহ উক্ত ধাৰাৰ সুৰক্ষা পৰিসৰৰ বাহিৰত।
উচ্চতম ন্যায়ালয়ে উল্লেখ কৰে যে আইনখনৰ ১৭(এ) ধাৰাটো চৰকাৰী বিষয়াসকলক কৰ্তব্য পালনৰ সময়ত লোৱা বৈধ সিদ্ধান্ত বা অনুমোদনৰ বাবে হাৰাশাস্তিৰ পৰা ৰক্ষা কৰিবলৈহে প্ৰণয়ন কৰা হৈছিল। এই ধাৰাটো সকলো ক্ষেত্ৰতে সমানে প্ৰযোজ্য নহয় বুলি স্পষ্ট কৰি আদালতে কয় যে এই সুৰক্ষা কেৱল তেতিয়াহে প্ৰযোজ্য হ’ব, যেতিয়া চৰকাৰী বিষয়াগৰাকীয়ে নিজৰ চৰকাৰী কৰ্তব্য পালনৰ খাতিৰত প্ৰকৃততে কোনো ‘সিদ্ধান্ত’ গ্ৰহণ কৰে বা ‘পৰামৰ্শ’ আগবঢ়ায়। যিহেতু উৎকোচ গ্ৰহণ কৰাটো এনে কোনো চৰকাৰী কৰ্তব্যৰ অন্তৰ্গত নহয়, সেয়েহে এই ক্ষেত্ৰত ১৭(এ) ধাৰাৰ সুৰক্ষা দাবী কৰিব নোৱাৰি।
আদালতৰ তথ্য অনুসৰি, ৰাজস্থানৰ চিৰোহীত উপ-আৰক্ষী অধীক্ষকৰ কাৰ্যালয়ত কৰ্মৰত কনিষ্টবল তেজৰামৰ বিৰুদ্ধে দেবেন্দ্ৰ কুমাৰ নামৰ আন এজন কনিষ্টবলে ২০২১ চনৰ ২২ এপ্ৰিলত ইমেইলযোগে এক অভিযোগ দাখিল কৰিছিল। অভিযোগ অনুসৰি, তেজৰামে আৰক্ষী অধীক্ষকৰ নামত ডেৰ লাখ টকাৰ উৎকোচ দাবী কৰিছিল। ইয়াৰ পাছতে ২০২১ চনৰ ৪ জুনত তেওঁৰ বিৰুদ্ধে এখন এজাহাৰ পঞ্জীয়ন কৰা হয় আৰু ১ ছেপ্টেম্বৰত তেওঁক গ্ৰেপ্তাৰ কৰা হয়। ২০২৪ চনৰ জানুৱাৰীত অভিযোগনামা দাখিল কৰাৰ পাছত ছেপ্টেম্বৰ মাহত পালিৰ এখন বিশেষ আদালতে তেওঁৰ বিৰুদ্ধে অভিযোগ গঠন কৰে। এই নিৰ্দেশক প্ৰত্যাহ্বান জনাই তেজৰামে উচ্চ ন্যায়ালয়ৰ কাষ চাপিছিল যদিও ২০২৫ চনৰ মাৰ্চ মাহত তেওঁৰ আবেদন খাৰিজ কৰা হয়। পৰৱৰ্তী সময়ত সৰ্বোচ্চ ন্যায়ালয়েও এই গোচৰটোত একেই ৰায় বাহাল ৰাখে, যাৰ ফলত এতিয়া অভিযুক্ত কনিষ্টবলগৰাকীৰ বিৰুদ্ধে দুৰ্নীতিৰ আইনী প্ৰক্ৰিয়া আৰু বিচাৰ অব্যাহত থাকিব।
