এবছৰ নহয়, দুবছৰ নহয়, প্ৰায় দুশ বছৰ ধৰি এটা কাঁচৰ পাত্ৰত সংৰক্ষণ কৰি ৰখা হৈছে এজন কুখ্যাত চিৰিয়েল কিলাৰৰ কটা মূৰ।
আইনষ্টাইনৰ মগজু তেওঁৰ মৃত্যুৰ পিছত গৱেষণাৰ বাবে সংৰক্ষণ কৰি ৰাখিছিল টমাছ হাৰ্ভেই।
কিন্তু এজন চিৰিয়েল কিলাৰৰ মগজু কি কাৰণে সংৰক্ষণ কৰা হ’ল বাৰু তাকে লৈ বহুতৰে মনত আজিও কৌতূহল ৰৈ গৈছে।
পৰ্টুগালৰ ৰাজধানী লিচবনৰ সংগ্ৰহালয়ত কাঁচৰ পাত্ৰত সংৰক্ষণ কৰি ৰখা কটা মূৰটো হৈছে কুখ্যাত অপৰাধী ডিয়েগো আলভেজৰ।
১৮১০ চনত জন্মগ্ৰহণ কৰা ডিয়েগো আলভেজে ১৯ বছৰ বয়সতে কামৰ সন্ধানত স্পেইনৰ গালিছিয়াৰ পৰা পৰ্তুগালৰ লিচবনলৈ আহিছিল।
কিন্তু শিক্ষা-দীক্ষা নথকা আলভেজক কোনেও কাম দিবলৈ বিচৰা নাছিল।
লিচবনত আলভেজে ধৰিছিল মদ আৰু জুৱাত। এটা সময়ত ধনৰ যোগাৰ কৰিবলৈ তেওঁ ইটোৰ পিছত সিটোকৈ হত্যাকাণ্ড সংঘটিত কৰিবলৈ ধৰিছিল।
আলভেজে তেওঁৰ জীৱন কালত ৭০ জনৰো অধিক লোকক একে কায়দাৰে হত্যা কৰিছিল। লিচবনৰ ২১৩ ফুট দীঘল দলং এখনৰ ওপৰলৈ তেওঁ হত্যাৰ বাবে বাচি লোৱা লোকসকলক লৈ গৈছিল আৰু দলঙৰ ওপৰৰ পৰা তেওঁলোকক পেলাই দিছিল।
মৃতদেহ উদ্ধাৰৰ পিছত সকলোৱে এয়া আত্মহত্যা বুলিয়েই ধৰি লৈছিল।১৮৩৬ চনৰ পৰা ১৮৩৯ চনলৈ আলভেজে চলাই গৈছিল তেওঁৰ হত্যালীলা।
এবাৰ এজন চিকিৎসকৰ ঘৰত ডকাইতি কৰিবলৈ গৈ আলভেজে চাৰিজন লোকক হত্যা কৰাৰ সময়তে আৰক্ষীৰ হাতত ধৰা পৰে।ইয়াৰ পিছতে ওলাই পৰে আলভেজৰ সমস্ত কুকীৰ্তিৰ কথা।
আলভেজৰ বিচাৰ চলিল আৰু ১৮৪১ চনৰ ১৯ ফেব্ৰুৱাৰীৰ দিনা তেওঁক ফাঁচীকাঠত ওলোমোৱা হ’ল।
ফাঁচীৰ পিছতে আলভেজৰ মূৰটো গৱেষণাৰ বাবেই সংৰক্ষণ কৰি ৰখা হ’ল।কিন্তু কি এই গৱেষণা? মানুহ কিদৰে ইমান নৃশংস হ’ব পাৰে তাৰেই কাৰণ বিচাৰি কৰা গৱেষণা এয়া।
