ডিজিটেল যুগত এতিয়া মানুহে উন্নতিৰ জখলাৰে ক্ৰমাৎ আগুৱাই গৈছে।
সময় যোৱাৰ লগে লগে উন্নত হৈছে মানুহৰ চিন্তা-ভাৱনা।
কিন্তু দেশত এতিয়াও এখন ৰাজ্য আছে য’ত বাহনত লিখা থাকে গাড়ীৰ মালিকৰ জাত-পাতৰ কথা।
গাড়ীৰ মালিক ব্ৰাহ্মণ নে ক্ষত্ৰিয় নে যাদৱ সেই কথা গাড়ীত লগাই থোৱা ষ্টিকাৰৰ পৰাই বুজিব পাৰি।
গাড়ীত জাত-পাতৰ উল্লেখ থকা ৰাজ্য খন হৈছে যোগী আদিত্য নাথ নেতৃত্বাধীন উত্তৰ প্ৰদেশ।
উত্তৰ প্ৰদেশৰ প্ৰায় সংখ্যক বাহনতেই উল্লেখ থাকে গাড়ীৰ গৰাকীৰ জাত-পাতৰ কথা।
ৰাজ্যখনত বংশ মৰ্যাদা বুজাবলৈ চাৰিচকীয়া বাহন অথবা মটৰ চাইকেল আদিত জাতৰ কথা উল্লেখ কৰাটো এতিয়া সাধাৰণ কথাত পৰিণত হৈছে।
দেশৰ ভিতৰত উত্তৰ প্ৰদেশতেই জাত-পাতৰ বিচাৰ আজিও শক্তিশালী ৰূপত বৰ্তি আছে।
ৰাজ্যখনৰ দলিত সম্প্ৰদায়ৰ লোকসকলে আজিও মানুহ হিচাবে জীয়াই থকাৰ অধিকাৰ পোৱা নাই। দলিত যুৱতীক বলাৎকাৰ কৰি ঘটনাক অন্য ৰূপ দিয়াৰ চেষ্টা চলোৱা হৈছে।
ইয়াৰ মাজতে ২০০৩ চনৰে পৰা ৰাজ্য খনত যান-বাহনত জাত-পাতৰ উল্লেখ কৰা প্ৰথাটো জনপ্ৰিয় হৈ পৰে।
ৰাজ্যখনত প্ৰচলিত এনে নিয়মৰ বিৰুদ্ধে ব্যাপক প্ৰতিক্ৰিয়া হোৱাৰ পিছতে উত্তৰ প্ৰদেশৰ অতিৰিক্ত পৰিবহন আয়ুক্ত মুকেশ চন্দ্ৰই এক নিৰ্দেশনা জাৰি কৰিবলৈ বাধ্য হৈছে।
মহাৰাষ্ট্ৰ হৰ্ষল প্ৰভু নামৰ লোক জনে প্ৰধানমন্ত্ৰীক এই ঘটনাৰ বিষয়ে উল্লেখ কৰি চিঠি লিখাৰ পিছতে প্ৰধানমন্ত্ৰীৰ কাৰ্যালয়ৰ হেঁচাতে উত্তৰ প্ৰদেশৰ চৰকাৰে গাড়ীত জাত-পাত লিখা বন্ধ কৰিবলৈ তৎপৰ হৈ পৰিছে।
এতিয়াৰে পৰা যিবোৰ গাড়ীত জাত-পাতৰ কথা উল্লেখ থাকিব তেনে গাড়ী বাজেয়াপ্ত কৰা হ’ব বুলি চৰকাৰে নিৰ্দেশনা জাৰি কৰিছে।
