বৰপেটা জিলাৰ সৰুক্ষেত্ৰী সমষ্টিৰ প্ৰাণকেন্দ্ৰ কয়াকুছি বজাৰত আজি চি পি আই (এম)ৰ এখন জনসভা অনুষ্ঠিত হয়।
অৱসৰপ্ৰাপ্ত শিক্ষক আফাজ উদ্দিনৰ সভাপতিত্বত অনুষ্ঠিত এই জনসভাত অংশগ্ৰহণ কৰি বৰ্ষীয়ান ৰাজনীতিবিদ তথা বৰপেটা লোকসভা সমষ্টিৰ প্ৰাক্তন সাংসদ উদ্ধৱ বৰ্মনে বিজেপি দল আৰু চৰকাৰক তীব্ৰ সমালোচনা কৰে।
ভাষণ প্ৰসংগত তেওঁ কয় যে, বিজেপি দল আৰু চৰকাৰ সম্পূৰ্ণৰূপে আৰ এছ এছৰ আজ্ঞাবাহী দল। বিজেপিৰ গুৰু হ’ল জাৰ্মানীৰ হিটলাৰ।
লগতে প্ৰধান মন্ত্ৰী নৰেন্দ্ৰ মোদীৰ প্ৰিয় ভাজন আম্বানী আৰু আদানীক এতিয়া ভাৰতবৰ্ষখন গতাই দিয়াৰ লগতে কৃষি আইনৰ জৰিয়তে কৃষিখণ্ডৰ সকলো স্বত্ব তেওলোকৰ ওচৰত গতাই দিয়াৰ বাবে বিজেপি চৰকাৰে ষড়যন্ত্ৰ ৰচনা কৰা বুলিও তেওঁ লগতে কয়।
এই জনসভাত উপস্থিত থাকি চি পি আই (এম)ৰ কেন্দ্ৰীয় কমিটিৰ সদস্য তথা সাপ্তাহিক “গণশক্তি” কাকতৰ সম্পাদক সুপ্ৰকাশ তালুকদাৰ, চি পি আই (এম) নেতা আজিজুৰ ৰহমান, পিয়াৰুল ইছলাম আহমেদেও ভাষণ প্ৰদান কৰে।
