ভাৰতীয়-আমেৰিকান ছাব্ৰিনা সিঙক আমেৰিকা যুক্তৰাষ্ট্ৰৰ পৰৱৰ্তী ৰাষ্ট্ৰপতি জো বিডেনৰ কাৰ্যকালত হোৱাইট হাউছৰ ডেপুটি প্ৰেছ চেক্ৰেটাৰী হিচাপে নিযুক্ত হ’ব।
ছাব্ৰিনা সিং বিডেন-হেৰিছ প্ৰচাৰ অভিযানৰ উপ ৰাষ্ট্ৰপতি পদত নিৰ্বাচিত কমলা হেৰিছৰ প্ৰেছ চেক্ৰেটাৰী আছিল।
আমেৰিকাৰ ৰাষ্ট্ৰপতি পদত নিৰ্বাচিত জো বিডেন আৰু উপ ৰাষ্ট্ৰপতি পদত বিজয়ী কমলা হেৰিছে শুকুৰবাৰে হোৱাইট হাউছৰ কৰ্মচাৰীৰ অতিৰিক্ত সদস্যৰ নামসমূহ ঘোষণা কৰে।
বিডেন-হেৰিছৰ টীমৰ পৰা প্ৰকাশ কৰা এক বিবৃতিত কোৱা হৈছে যে এই নিযুক্তিসমূহ ৰাষ্ট্ৰপতি আৰু উপ ৰাষ্ট্ৰপতি নিৰ্বাচিত প্ৰাৰ্থী দুগৰাকীৰ এনেকুৱা এক প্ৰশাসনৰ প্ৰতিফলন যে প্ৰথম দিনটোৰ পৰাই যাতে আমেৰিকাৰ চৰিত্ৰ প্ৰকাশ পায় আৰু আমেৰিকাবাসীক সুফল দিবলৈ সক্ষম হয়।
ছাব্ৰিনা সিঙৰ প্ৰচাৰাভিযানত ভূমিকা হিচাপে মাইক ব্লুমবাৰ্গৰ প্ৰেছিডেন্সিয়েল নিৰ্বাচনৰ জ্যেষ্ঠ মুখপাত্ৰ আৰু ক’ৰী বুকাৰৰ প্ৰেছিডেন্সিয়েল নিৰ্বাচনৰ প্ৰচাৰ অভিযানৰ নেশ্যনেল প্ৰেছ চেক্ৰেটাৰী হিচাপে সেৱা আগবঢ়াইছিল।
তেওঁ পূৰ্বে ডেম’ক্ৰেটিক নেশ্যনেল কমিটিৰ ডেপুটি কমিউনিকেশ্যন ডিৰেক্টৰ, আমেৰিকান ব্ৰীজ’ছ ট্ৰাম্প ৱাৰ ৰুমৰ মুখপাত্ৰ আৰু ২০১৬চনত ৰাষ্ট্ৰপতি পদৰ প্ৰাৰ্থী হিলাৰী ক্লিন্টনৰ ৰিজ’নেল কমিউনিকেশ্যন ডিৰেক্টৰ হিচাপেও কাম কৰিছিল।
