বিগত বছৰৰ দৰেই যোৰহাট জিলাৰ টীয়কৰ অন্যতম চৰকাৰী অগ্ৰণী বিদ্যালয় টীয়ক উচ্চতৰ মাধ্যমিক বালিকা বিদ্যালয়ৰ কৃতী ছাত্ৰীসকলক সম্বৰ্দ্ধনা আৰু অভিনন্দন জ্ঞাপন কৰাৰ অৰ্থে আজি বিদ্যালয়ৰ প্ৰেক্ষাগৃহত এক অভিনন্দন অনুষ্ঠানৰ আয়োজন কৰা হয়।
বিদ্যালয়ৰ পৰিচালনা সমিতিৰ সভাপতি ডা: মহানন্দ নেওগৰ সভাপতিত্ব আয়োজিত এই অভিনন্দন অনুষ্ঠানত বিশিষ্ট অতিথিৰূপে অৰ্ধ সামৰিক বাহিনীৰ ১২৮ নং বেটেলিয়নৰ কামাণ্ডেন্ট ডা: স্নিগ্ধা চেতীয়া আৰু সদ্য ঘোষিত অসম লোকসেৱা আয়োগৰ পৰীক্ষাত উত্তীৰ্ণ হৈ টীয়কলৈ গৌৰৱ কঢ়িয়াই অনা ৰন্টু বৰুৱা বিশেষভাৱে উপস্থিত থাকে।
অনুষ্ঠানত বিদ্যালয়ৰ অধ্যক্ষ ৰাজু কুমাৰ শইকীয়া, প্ৰাক্তন অধ্যক্ষ ৰত্নেশ্বৰ গগৈ,মিনতি বৰুৱা,নীৰেণ শৰ্মা পাঠককে প্ৰমুখ্য কৰি কেইবাগৰাকীও বিশিষ্ট ব্যক্তি উপস্থিত থাকি কৃতী ছাত্ৰীসকলক উৎসাহিত কৰে।
উক্ত অনুষ্ঠানতে উচ্চতৰ মাধ্যমিকৰ চুড়ান্ত পৰীক্ষাত বাণিজ্য শাখাত পঞ্চম স্থান প্ৰাপ্ত টীয়কৰ সুসন্তান অংকুৰ জ্যোতি ভুঞা,বিদ্যালয়খনৰ হাইস্কুল শিক্ষান্ত আৰু উচ্চতৰ মাধ্যমিক পৰীক্ষাত কৃতী ছাত্ৰীক সম্বৰ্দ্ধনা আৰু হাইস্কুল শিক্ষান্ত পৰীক্ষাত RETAIL TRADE ত ১০০% লাভ কৰা চন্দনা শইকীয়াক সম্বৰ্দ্ধনা জনোৱা হয়।
লগতে বিভিন্ন শিতানত দাতা পৰিয়ালে আগবঢ়োৱা প্ৰয়াত লক্ষেশ্বৰ শৰ্মা ন্যাস বঁটা ,চিদানন্দ বৰুৱা স্মৃতি বঁটা ,আইদেউ বৰবড়া সোঁৱৰণি চলন্ত বঁটা ,কৃতী শিক্ষয়ত্ৰী কুসুম চেতীয়া চলন্ত বঁটা ,কমল চন্দ্ৰ বৰুৱা ন্যাস বঁটা ,সৰু আইটি বৰুৱা ন্যাস বঁটাৰ লগতে টীয়কৰ সমাজকৰ্মী অঞ্জুমণি বৰদলৈয়ে ইংৰাজীত,পূৰ্ণিমা শইকীয়াই হাইস্কুল শিক্ষান্ত পৰীক্ষাত অংক বিষয়ত সৰ্বোচ্চ নম্বৰ প্ৰাপকক আৰু ত্ৰৈলোক্য চেতীয়াই IT/ITCS আৰু RETAIL TRADE বিষয়ত সৰ্বোত্তম প্ৰদৰ্শন কৰা ছাত্ৰীক আনুষ্ঠানিকভাৱে বঁটা প্ৰদান কৰে।
উক্ত অনুষ্ঠানতে বিদ্যালয়ৰ পৰা বিভিন্ন বিষয়ত লেটাৰ মাৰ্ক পোৱা বিষয় শিক্ষক সকলকো একোটিকৈ বঁটা আৰু RETAIL TRADE ৰ বিষয় শিক্ষক শিব দাসক বিদ্যালয় তৰফৰ পৰা সম্বৰ্দ্ধনা জনোৱা হয়।
