পাকিস্তানৰ প্ৰধানমন্ত্ৰী ইমৰাণ খানৰ পদত্যাগ দাবী অধিক তীব্ৰ কৰি তুলিছে পাকিস্তানৰ বিৰোধী ৰাজনৈতিক শিবিৰে।
দেশখনৰ ১১ টা বিৰোধী দলৰ জোটে প্ৰধানমন্ত্ৰী ইমৰাণ খানৰ পদত্যাগৰ দাবী জনাই তেওঁলোকৰ প্ৰধানমন্ত্ৰী বিৰোধী আন্দোলনক ‘জেহাদ’ বুলি অভিহিত কৰিছে বিৰোধী জোটৰ প্ৰধান মৌলানা ফজলুৰ ৰহমানে।
বিৰোধী নেতাগৰাকীয়ে ইমৰাণ খানক কটাক্ষ কৰি কয় যিমান দিন দুখীয়াৰ ওপৰত এই চৰকাৰকে অত্যাচাৰ চলাব সিমান দিন এই জেহাদ অব্যাহত থাকিব।
ইমৰাণ খানৰ অপসাৰণৰ বাবে যিকোনো ত্যাগ কৰিবলৈ সদা প্ৰস্তুত বুলি দাবী কৰি ৰহমানে লগতে কয় যে পাক জনতাই তেওঁলোকে উত্থাপন কৰা প্ৰধানমন্ত্ৰী ইমৰাণ খানৰ পদত্যাগৰ দাবীৰ জনমত গঠনত অংশগ্ৰহণ কৰিব লাগে।
জেনেৰেল জিৰাউল হক আৰু পাৰভেজ মুশ্বাৰফৰ আমোলৰ পাক চৰকাৰৰ সৈতে ইমৰাণ খানৰ চৰকাৰক তুলনা কৰি তেওঁ লগতে কয় যে এই মুহূৰ্তত পাকিস্তানত কোনো গণতন্ত্ৰ নাই।
ৰহমানৰ দাবী যে পাকিস্তানৰ সামৰিক শাসকতকৈ ইমৰাণ খানৰ চৰকাৰৰ দিনতহে পাকিস্তানী সেনাই অধিক কঠোৰ আচৰণ কৰিছে।
উল্লেখ্য যে পাকিস্তানৰ বিৰোধী শক্তিয়ে এক জোট হৈ ইমৰাণ খানৰ চৰকাৰৰ তথা প্ৰধানমন্ত্ৰী ইমৰাণ খানৰ পদত্যাগৰ দাবী কৰি আহিছে। যোৱা ১৬ অক্টোবৰৰ পৰা আৰম্ভ হোৱ হোৱা এই চৰকাৰ বিৰোধী আন্দোলনৰ গতি কম চাৰি ক্ৰমশঃ অধিক শক্তিশালী হোৱাহে পৰিলক্ষিত হৈছে।
ইফালে ঐক্যৱদ্ধ বিৰোধী জোটে পাক প্ৰধানমন্ত্ৰী ইমৰাণ খানক অহা ৩১ জানুৱাৰীৰ ভিতৰত পদত্যাগ কৰিবলৈ দাবী কৰিছে।
