বাক্সা জিলাৰ তামুলপুৰৰ চিকনিবাৰীত ১ ফেব্ৰুৱাৰীৰ পৰা ৩ ফেব্ৰুৱাৰীলৈ তিনিদিনীয়া বৰ্ণাঢ্য কাৰ্যসূচীৰে তামুলপুৰ জিলা এবিএমছু আৰু দ্বাৰকুছি আঞ্চলিক এবিএমছুৰ ষষ্ঠ দ্বিবাৰ্ষিক অধিবেশন অনুষ্ঠিত হৈ যায়।
এই উপলক্ষে বুধবাৰে পুৱাৰ ভাগত উলিওৱা হয় বৰ্ণাঢ্য সাংস্কৃতিক শোভাযাত্ৰা। আবেলি দুই বজাত অনুষ্ঠিত হয় মুকলি অধিবেশন। তামুলপুৰ জিলা এবিএমছুৰ সভাপতি হালিম খানৰ পৌৰাহিত্যত অনুষ্ঠিত মুকলি সভাত নিৰ্দিষ্ট বক্তা হিচাপে অংশ গ্রহণ কৰে গুৱাহাটী উচ্চ ন্যায়ালয়ৰ অধিবক্তা তথা সাংবাদিক দীপক শৰ্মাই।
দীপক শৰ্মাই সংখ্যালঘু সমাজখনক শিক্ষাৰ ক্ষেত্ৰত আগুৱাই নিয়াৰ ক্ষেত্ৰত এবিএমছুক গুৰুত্বপূৰ্ণ ভূমিকা লোৱাৰ আহ্বান জনায়। সভাত আছুকে ধৰি কেইবাটাও ছাত্র সংগঠনৰ নেতা উপস্থিত থাকে।
সভাৰ অন্তত এবিএমছুৰ কেন্দ্ৰীয় সমিতিৰ সাধাৰণ সম্পাদক টাইচন হুছেইনে কেইবাটাও গুৰুত্বপূৰ্ণ মন্তব্য কৰে। সংবাদ মাধ্যমক সম্বোধন কৰি টাইচন হুছেইনে কয় তামুলপুৰ জিলা আৰু দ্বাৰকুছি আঞ্চলিক এবিএমছুৰ ষষ্ঠ দ্বি বাৰ্ষিক অধিবেশনত হেজাৰ হেজাৰ মানুহৰ সমাগম হৈছে। এই অঞ্চলৰ বিভিন্ন জাতীয় জীৱনৰ সমস্যাক অধিবেশনত লৈ আলোচনা কৰা হৈছে।
আগন্তুক দিনত সমগ্ৰ অসমৰ জাতীয় জীৱনৰ যি সমস্যা, জাতিৰ যি সমস্যা, এই জটিল সন্ধিক্ষণত শংকৰ আজানৰ বাণী বিলাই একেলগে ঐকবদ্ধভাৱে যাতে আগুৱাই যাব পাৰি সেই বিষয়েও আলোচনা কৰা হৈছে বুলি কয় নেতাগৰাকীয়ে।
এবিএমছুয়ে পৰবৰ্তী সময়ত ছদ্মবেশী বিজেপি শক্তিৰ বিৰুদ্ধে ধৰাবাহিক ভাৱে ৰাইজক সজাগ আৰু সচেতন কৰি গণতান্ত্ৰিক সংগ্ৰাম চলাই যাব।
বিজেপিয়ে অসমীয়া জাতিক থানবান কৰি নিজৰ মুনাফা আদায় কৰাৰ বাবে হিন্দু-মুছলমানৰ মাজত সংঘাত লগাব বিচাৰে বুলি অভিযোগ কৰে ছাত্ৰ নেতাগৰাকীয়ে।
ভূমি অধিকাৰৰ পৰা বঞ্চিত কৰাৰ কাৰণে বিজেপিয়ে যি ষড়যন্ত্ৰ ৰচিছে, ইয়াৰ বিৰুদ্ধে এবিএমছুয়ে তীব্ৰ গণতান্ত্ৰিক আন্দোলন চলাই নিব বুলিও ঘোষণা কৰে হুছেইনে।
বিটিচি অঞ্চলত সকলোৰে ভূমি অধিকাৰ নিশ্চিত কৰাৰ আহ্বান জনাইছে ছাত্ৰ নেতাগৰাকীয়ে প্ৰমোদ বড়োৱে দিয়া প্ৰতিশ্ৰুতি ৰক্ষা কৰিবলৈও আহ্বান জনায়।
বিটিচি প্ৰধান প্ৰমোদ বড়োক আহ্বান জনাই কয় ইউপিপিএলৰ কেন্দ্ৰীয় পৰ্যায়ৰ কেইগৰাকীমান বিষয়-ববীয়াই এবিএমছুক বিভাজন কৰাৰ যি ষড়যন্ত্ৰ কৰিছে সেইসকল নেতাক প্ৰমোদ বড়োৱে নাকী লগাব পৰা নাই কিয় বুলিও প্ৰশ্ন কৰে প্ৰমোদ বড়োক।
