দেওবাৰে নিশা কাৰ্বি আংলং জিলাৰ বকলিয়াত এক গণপ্ৰহাৰ ঘটনা সংঘটিত হৈছে। গণ প্ৰহাৰত মৃত্যু হৈছে এজন লোকৰ।
ঘটনাৰ বিৱৰণীৰ মতে জিলাখনৰ বকলিয়া আৰক্ষী থানাৰ অন্তৰ্গত বাৰেলং বে গাঁৱত মনছিং ৰংপি(৩০) নামৰ লোকজনক কাৰাছী গাঁৱৰ এগৰাকী মহিলাৰ সৈতে অসংযত অৱস্থাত গঞাই প্ৰত্যক্ষ কৰে।
ইয়াৰ পিছতে লোকজনক গাঁৱৰ খেলপথাৰলৈ নি গ’লপোষ্টত বান্ধি গঞাই সংগঠিতৰূপত শাৰীৰিক আক্ৰমণ চলাবলৈ আৰম্ভ কৰে।
বাঁহৰ লাঠি, খৰি আদিৰে গঞাই প্ৰহাৰ কৰাৰ লগতে চোকা অস্ত্ৰেৰে আক্ৰমণ কৰাৰ ফলত মনছিং ৰংপি নামৰ লোকজনৰ ঘটনাস্থলীতে মৃত্যু ঘটে।
ঘটনা খবৰ লাভ কৰিয়ে সোমবাৰে পুৱা বকলিয়া আৰক্ষী থানাৰ আৰক্ষীয়ে ঘটনাস্থলীত উপস্থিত হৈ মৃতদেহটো নিজৰ জিম্মালৈ আনি মৰণোত্তৰ পৰীক্ষাৰ বাবে ডিফু চিকিৎসা মহাবিদ্যালয় আৰু চিকিৎসালয়লৈ প্ৰেৰণ কৰে।
ঘটনাৰ সন্দৰ্ভত বকলিয়া থানাৰ আৰক্ষীয়ে কেচ নং ০৯/২১ত এক গোচৰ পঞ্জীয়ন কৰি ইতিমধ্যে ঘটনাত জড়িত থকাৰ অভিযোগত চম্প্ৰী টেৰণ(২৪), কাহানবামন টক্বি (১৮) , শিৱ ৰংহাং, ৱাইছং ক্ৰামছা(১৯), শুকুমছিং ৰংহাং(১৮), ৰুস্তম ৰংফাৰ(২৫),ধনীৰাম ৰংফাৰ(৩০) আৰু জিপ ইঙ্ঘিক গ্ৰেপ্তাৰ কৰিছে।
