কাশ্মীৰৰ সেই ৰক্তাক্ত দিনটোত দেশে হেৰুৱাইছিল ৪০জনকৈ বীৰ সন্তানক। ২০১৯ চনৰ ১৪ ফেব্ৰুৱাৰিত কাশ্মীৰৰ পুলুৱামাত চিআৰপিএপৰ কনভয়ত চলোৱা হৈছিল ভয়ংকৰ আক্ৰমণ। শ্বহীদ হৈছিল ৪০জনকৈ জোৱান।
আত্মঘাতী বোমা আক্ৰমণকাৰীৰ গাড়ীয়ে চিআৰপিএফৰ কনভয়ত খুন্দা মাৰিছিল। এই আক্ৰমণত ৪০জন জোৱানৰ মৃত্যু হৈছিল।
ৰাষ্ট্ৰীয় তদন্তকাৰী সংস্থা এন আই এ চাৰ্জশ্বীট দাখিল কৰে। পাকিস্তানী সন্ত্ৰাসবাদী সংগঠন জইচ-ই-মহম্মদৰ নেতা মাছুদ আজাহাৰ আৰু তেওঁৰ ভাতৃ ৰৌফ আজগৰৰ নাম মূল ষড়যন্ত্ৰকাৰীৰ তালিকাত অন্তৰ্ভুক্ত কৰা হয়।
পুলুৱামা আক্ৰমণত ব্যৱহাৰ হোৱা আৰ ডি এক্স পাকিস্তানৰ পৰাই যে আহিছিল তাৰ প্ৰমান তদন্তকাৰী সংস্থাটোৱে দাখিল কৰিছে। সেইদৰে সন্ত্ৰাসবাদীৰ অনুপ্ৰৱেশৰ প্ৰমানো এন আই এ দাঙি ধৰিছে।
আনহাতে, ঘটনাৰ সৈতে জড়িত হোৱাটছএপ চ্যাট, মোবাইলত ৰেকৰ্ড কৰা ভিডিঅ’, কল লিষ্টকে ধৰি এন আই এৰ হাতত বহুত প্ৰমান আছিল।
এন আই এৰ ষড়যন্ত্ৰকাৰীসকলৰ তালিকাত প্ৰায় ২০ জনৰ নাম আছে। ইয়াৰ মাজত আদিল আহমেদ ডৰ, চাকিব বছিৰ মাৰগ্ৰে, মহম্মদ ইকবাল, বিলাল আহমেদ কুচে আৰু ওমৰ ফাৰুক। তদুপৰি, চাৰ্জশ্বীটত লস্কৰৰ কেইবাজনো স্থানীয় কৰ্মীৰ নামো আছে।
পুলুৱামাৰ সেই ভয়ংকৰ ঘটনাৰ আজি দুবছৰ সম্পূৰ্ণ হোৱা উপলক্ষে সমগ্ৰ দেশবাসীয়ে শ্বহীদ বীৰ জোৱানসকললৈ শ্ৰদ্ধাঞ্জলি জনাইছে।
