বৃহৎ বিজয়! চেন্নাইৰ এম.এ. চিদাম্বৰম ষ্টেডিয়ামত অনুষ্ঠিত ইংলেণ্ডৰ বিৰুদ্ধ চলিত টেষ্ট শৃংখলাৰ দ্বিতীয়খন মেচত ভাৰতে ৩১৭ ৰাণৰ বিশাল বিজয়ৰ সোৱাদ লাভ কৰিছে।
৪২৯ ৰাণৰ লক্ষ্যৰে তৃতীয় দিনাৰ খেলৰ শেষলৈকে ৩টা উইকেট হেৰুৱাই সংগ্ৰহ কৰা ৫৭ ৰাণৰ পৰা ইনিংছ আৰম্ভ কৰি ইংলেণ্ড ১৬৪ ৰাণতে অল আউট হয়।
ইনিংছ আৰম্ভ কৰি ডান লৰেন্সে খুব সোনকালেই ৫৩ বলত ২৬ ৰাণ কৰি বিদায় লোৱাৰ পাছতে ইংলেণ্ডৰ বেটিং ক্ৰম তাচপাতৰ ঘৰৰ দৰে সৰি পৰিব ধৰে।
ক্ষুৰধাৰ বলিঙেৰে অক্ষৰ পেটেলে পাঁচটাকৈ মূল্যৱান উইকেট লাভ কৰাৰ বিপৰীতে ইংলেণ্ডৰ বাবে প্ৰথম ইনিংছত দুঃস্বপ্ন হৈ পৰা অশ্বিনে লাভ কৰে তিনিটাকৈ উইকেট।
তেওঁলোকক সহযোগিতা প্ৰদান কৰে কুলদীপ যাদৱে, তেওঁৰ ভাগত পৰে দুটাকৈ উইকেট।
ইংলেণ্ডৰ বাবে ভৰসাস্বৰূপ লৰেন্স (২৬), বেন ষ্ট’কছ (৮), অলী প’প (১২), বেন ফ’কছ (২) চূড়ান্তভাৱে ব্যৰ্থ হয়।
অধিনায়ক জ’ ৰুটে কিছু ধৈৰ্যশীলতাৰ পৰিচয় দিছিল যদিও যোগ্য সহযোগিতাৰ অভাৱত ৯২ বলত ৩৩ ৰাণ কৰি অক্ষৰ পেটেলৰ বলত পেভিলিঅ’নমুখী হয়।
শেষৰ ফালে ময়িন আলীয়ে ইনিংছটোৰ সৰ্বোচ্চ স্ক’ৰ হিচাপে মাত্ৰ ১৮ বলত ৪৩ ৰাণ কৰি কিছু আমোদ প্ৰদান কৰে।
মেচখনৰ প্ৰথম দিনা ভাৰতে টচত জিকি প্ৰথম ইনিংছত ৩২৯ ৰাণ সংগ্ৰহ কৰি আটাইকেইটা উইকেট হেৰুৱায়।
ভাৰতৰ প্ৰথম ইনিংছত সৰ্বাধিক ৰোহিত শৰ্মাই ১৬১ৰাণ সংগ্ৰহ কৰে। অজিংকা ৰাহানেই ৬৭ৰাণ কৰাৰ উপৰি ঋষভ পন্টে ৫৮ৰাণ কৰি অপৰাজিত হৈ থাকে।
দ্বিতীয় দিনা ভাৰতৰ ৩২৯ ৰাণৰ প্ৰত্যুত্তৰত বেটি কৰিবলৈ নামি ইংলেণ্ডে ৰবীচন্দ্ৰন অশ্বিন আৰু অক্ষৰ পেটেলৰ ক্ষুৰধাৰ বলিঙত তিষ্ঠিব নোৱাৰি ৫৯.৫ অভাৰত মাত্ৰ ১৩৪ ৰাণতে আটাইকেইটা উইকেট হেৰুৱায়।
ভাৰতে দ্বিতীয় ইনিংছত ২৮৬ ৰাণত অল আউট হয়। চেন্নাইৰ ঘৰুৱা খেলুৱৈ ৰবীচন্দ্ৰন অশ্বিনে ১০৬ ৰাণৰ এটা অতি মূল্যৱান শতকীয় ইনিংছ খেলে।
প্ৰথম টেষ্টত পৰাজিত হোৱাৰ পাছত এই বিজয়েৰে ভাৰতে চাৰিখনীয়া শৃংখলাটোত ১-১ সমতা স্থাপন কৰিছে।
উল্লেখযোগ্য যে এই বিজয়ৰ দ্বাৰা ভাৰতে ইতিমধ্যে আইচিচি টেষ্ট ৰেংকিঙত দ্বিতীয় স্থানলৈ উন্নীত হোৱাৰ বিপৰীতে ইংলেণ্ড অৱনমতি হ’ল চতুৰ্থ স্থানলৈ।
