আকাশত চাং পতা কথা বুলি ক’লে আমি যি বুজো দৰাচলতে দেখাত তেনেধৰণৰ ঘটনাই এইটো। কিন্তু এই ঘটনা বাস্তৱ। মেজিক নহয়, বিশ্বত ইতিহাস সৃষ্টি কৰি এইবাৰ প্ৰকৃততেই চাৰি চকাৰ গাড়ী উৰিল আকাশত।
আমেৰিকাৰ ফেডাৰেল অসামৰিক বিমান পৰিবহনে এই বিষয়টো নিশ্চিত কৰিছে।
ভূপৃষ্ঠৰ পৰা ১০ হাজাৰ ফুট উচ্চতাত উৰিছে এই মনমোহা গাড়ী। Terrafugia Transition য়ে নিৰ্মাণ কৰিছে এই গাড়ীখন।
গাড়ীখনে পথত যিদৰে গতি ল’ব পাৰে সেইদৰে আকাশতো চলিব পাৰে। সংস্থাটোৰ আৰু এনে গাড়ী চলোৱাৰ পৰিকল্পনা আছে।
Terrafugia Transition য়ে জানিবলৈ দিয়ে যে তেওঁলোকে আৱিষ্কাৰ কৰা এই গাড়ীখনে পথত সৰ্বাধিক ১৬০ কিলোমিটাৰ বেগত দৌৰিব পাৰে।
আমেৰিকাৰ বিমান পৰিবহনে এই গাড়ীখনক ‘স্পেচিয়েল লাইট স্প’ৰ্টছ এয়াৰক্ৰাফট’ হিচাপে অনুমোদন দিছে।
সম্প্ৰতি এই বাহনখনক লৈ প্ৰশিক্ষণ চলি আছে। বহু পাইলটে হাতে-কামে বিষয়টো বুজি লোৱাৰ চেষ্টা চলাইছে। বাহনখন পথত কিদৰে চলিব সেই বিষয়ে সকলো দিশ অহা এবছৰৰ ভিতৰত ঠিক কৰা হ’ব। চালকসকলে বিচাৰিলে এক মিনিটৰ ভিতৰতে গাড়ীখন বিমানলৈ সলনি কৰিব পাৰিব।
আনহাতে, এই ‘উৰণীয়া গাড়ী’খন অৱশ্যে সৰু বিমানবন্দৰ বা ৰাষ্ট্ৰীয় ঘাইপথতো অৱতৰণ কৰিব পাৰিব। হাইব্ৰীড ইলেকট্ৰিক মটৰ ব্যৱহৃত গাড়ীখনত প্ৰিমিয়াম পেট্ৰ’ল তথা বিমানৰ ইন্ধন ব্যৱহাৰ কৰা হৈছে।
বাতৰি অনুসৰি, ২০২২চনৰ ভিতৰতে এই বিমান-গাড়ীখনৰ চূড়ান্ত কামকাজ সম্পূৰ্ণ হ’ব। এই বাহনখন চলাবলৈ চালকৰ অনুজ্ঞাপত্ৰৰ লগতে স্পৰ্টছ পাইলট চাৰ্টিফিকেটৰ প্ৰয়োজন হ’ব। বাহনখনত অৱশ্যে বহাৰ বাবে দুখন আসন থাকিব।
