বনিয়াক সন্তুষ্ট কৰাতে ব্যস্ত থকা বিজেপি চৰকাৰ খনে দেশত মূল্যবৃদ্ধি ৰোধ কৰাৰ বাবে কোনো পদক্ষেপেই গ্ৰহণ কৰা নাই।
ৰাজ্যই ৰাজ্যই কেৱল কিছুসংখ্যক হিতাধিকাৰী সৃষ্টি কৰি সাফল্যৰ বাঃ বাঃ লোৱা বিজেপি চৰকাৰৰ দিনত অভূতপূৰ্ব ভাবে বৃদ্ধি পাইছে ইন্ধন আৰু গৃহ নিৰ্মাণত ব্যৱহৃত সামগ্ৰীৰ দাম।
পুঁজিপতিৰ সুৰক্ষাত ব্যস্ত বিজেপি চৰকাৰে গৃহ নিৰ্মাণৰ সামগ্ৰীৰ দাম বৃদ্ধি কৰা চক্ৰৰ বিৰুদ্ধে ব্যৱস্থা গ্ৰহণৰ সলনি এই বিষয়ত নিজৰ অসহায় অৱস্থাহে প্ৰকট কৰা পৰিলক্ষিত হৈছে।
সৌসিদিনা কেন্দ্ৰীয় পথ পৰিবহন দপ্তৰৰ মন্ত্ৰী নীতিন গাডকাৰীয়ে অসহায় ভাবে কৈছিল যে নিৰ্মাণ কাৰ্যত ব্যৱহৃত সামগ্ৰীৰ উৎপাদকসকলে এতিয়া এক লবীৰ সৃষ্টি কৰিছে আৰু সেই লবীয়েই সামগ্ৰীৰ মূল্য ইচ্ছা মতে বঢ়াই গৈছে।কিছুদিন পূৰ্বে চিমেণ্ট, তীখা আদিৰ মূল্যবৃদ্ধিৰ প্ৰসংগত মন্তব্য কৰি গাডকাৰীয়ে কৈছিল যে চিমেণ্ট, তীখা আদি নিৰ্মাণকাৰী কোম্পানীবোৰে নিজৰ ইচ্ছানুসৰি দাম বৃদ্ধি কৰি গৈছে।
ফলত চৰকাৰৰ বিভিন্ন পৰিকাঠামোজনিত নিৰ্মাণ কাৰ্যতো স্থৱিৰতা আহি পৰিছে।
বিল্ডাৰ্ছ এছোচিয়েছন অৱ ইণ্ডিয়াৰ ৱেষ্টাৰ্ণ মণ্ডলৰ বৈঠকত ভিডিঅ’ কনফাৰেন্সৰ জৰিয়তে অংশগ্ৰহণ কৰি গাডকাৰীয়ে কৈছিল যে চিমেণ্ট, তীখা আদি কোম্পানীবোৰৰ উৎপাদকসকলৰ নিৰ্দিষ্ট গোট আছে আৰু সেই গোটেই নিজৰ খেয়াল-খুছি অনুসৰি এনেবোৰ সামগ্ৰীৰ দাম বৃদ্ধি কৰি গৈছে।
চৰকাৰে অহা ৫ বছৰত প্ৰায় ১১১ লাখ কোটি টকাৰ পৰিকাঠামো সম্পৰ্কীয় নিৰ্মাণকাৰ্যৰ পৰিকল্পনা কৰিছে যদিও চিমেণ্ট, তীখা আদিৰ অত্যধিক মূল্যবৃদ্ধিৰ বাবে চৰকাৰ বিমোৰত পৰিবলগীয়া হৈছে।
কেন্দ্ৰীয় মন্ত্ৰী এগৰাকীয়ে নিৰ্মাণ সামগ্ৰীৰ দাম বৃদ্ধিৰ ক্ষেত্ৰত এনেদৰে অসহায় অৱস্থাৰ কথা প্ৰকাশ কৰাত স্বাভাৱিকতে বিমোৰত পৰিছে সাধাৰণ জনতা।কেন্দ্ৰত শাসনাধিষ্ঠিত চৰকাৰ খনে যদি অন্যায় ভাবে মূল্যবৃদ্ধি কৰাসকলক নাকী লগাব নোৱাৰে তেন্তে কোনে লগাব পাৰিব?নে বৃদ্ধি কৰা দামৰ ভাগ বিজেপিৰ নেতা-মন্ত্ৰীৰ পকেটলৈয়ো যায় বুলি বহুতে প্রশ্ন কৰিছে।
নিৰ্মাণ সামগ্ৰীৰ লগতে দেশত বিগত ১১ দিন ধৰি বাঢ়িছে পেট্ৰ’ল-ডিজেলৰ দাম।লক্ষ্যণীয় কথাটো হ’ল আন্তঃৰাষ্ট্ৰীয় বজাৰত খাৰুৱা তেলৰ দাম বৃদ্ধি নোহোৱাৰ পিছতো ভাৰতত তেলৰ দাম পিছে বাঢ়িহে গৈছে।
ইয়াৰ কাৰণ হিচাবে নিৰ্মলা সীতাৰমণে বাজেটতত ৰখা এটা প্ৰস্তাৱকে বহুতে দায়ী কৰিব বিচাৰিছে।
কেন্দ্ৰীয় বিত্তমন্ত্ৰীগৰাকীয়ে বাজেটত উল্লেখ কৰা মতে কৃষি খণ্ডৰ উন্নয়নৰ বাবে প্ৰতি লিটাৰ পেট্ৰ’লত ৪ টকা আৰু প্ৰতি লিটাৰ ডিজেলত ২,৫০ টকাকৈ agriculture infrastructure and development cess (AIDC) আৰোপ কৰা হ’ব বুলি ঘোষণা কৰিছিল।তেওঁ অৱশ্যে এই কৰৰ বোজা সাধাৰণ মানুহৰ ওপৰত নপৰে বুলিও কৈছিল।
কিন্তু বৰ্তমান আন্তঃৰাষ্ট্ৰীয় বজাৰত ইন্ধনৰ দাম বৃদ্ধি নোপোৱাৰ পিছতো ভাৰতত বৃদ্ধি পোৱাৰ কথাই সীতাৰমণে পেট্ৰ’ল-ডিজেলত লগোৱা ৪ টকা আৰু ২.৫০ টকাৰ কৃষি কৰে প্ৰভাৱ পেলোৱাতো নিশ্চিত বুলি সৰ্বত্ৰে চৰ্চা হৈছে।
ইয়াৰোপৰি প্ৰতিখন ৰাজ্যই নিজাকৈ ইন্ধনৰ ওপৰত লগোৱা কৰতো আছেই।
সাতে সোতৰই মিলি এতিয়া দেশত প্ৰতিদিনে ইন্ধনৰ দাম বৃদ্ধি পাই গৈ থকা বুলি ভবাৰ নিঃসন্দেহে থল আছে।
ইমানৰ পিছতো অৱশ্যে গা লৰা নাই নেতা-মন্ত্ৰীসকলৰ।নানান টুলুঙা মন্তব্যৰে তেওঁলোকে জনতাৰ সমস্যাসমূহক গৌণ কৰি পেলোৱাৰ প্ৰতিযোগিতাতহে নামি পৰা পৰিলক্ষিত হৈছে। আজিৰ তাৰিখত দেশবাসীৰ বাবে ইয়াতকৈ দুৰ্ভাগ্যৰ কথা কি হ’ব পাৰে বাৰু?
