শুকুৰবাৰে আমেৰিকা যুক্তৰাষ্ট্ৰৰ চোৰাংচোৱা সংস্থাই প্ৰকাশ কৰা এক প্ৰতিবেদনত চৌদী আৰৱৰ ৰাজপুত্ৰ তথা দেশখনৰ ভাবী ৰজা মহমম্দ বিন চালমানক এজন সাংবাদিক হত্যাৰ স’তে সাঙোৰ খাইছে।
ৱাশ্বিংটন প’ষ্ট কাকতৰ স্তম্ভলেখক তথা আমেৰিকা যুক্তৰাষ্ট্ৰ ভাৰ্জিনিয়াৰ বাসিন্দা জামাল খাছ’গ্গী(৫৯)ক ২০১৮ চনত চৌদী আৰৱৰ আততায়ীয়ে তুৰ্কীৰ ইনষ্টানবুলত হত্যা কৰিছিল।
আৰৱৰ ৰাজপুত্ৰজনে হাতত লোৱা বিভিন্ন আঁচনি-কৰ্মপদ্ধতিসমূহৰ সমালোচনা কৰাৰ বাবেই সাংবাদিকজনে প্ৰাণ হেৰুৱাব লগা হয়।
ৰাষ্ট্ৰীয় চোৰাংচোৱা সংস্থাৰ সঞ্চালকজনে প্ৰকাশ কৰা চাৰি পৃষ্ঠাৰ প্ৰতিবেদনখনত দাখিল কৰা মতে, সাংবাদিকজনক হত্যা অথবা আটক কৰাৰ ষড়যন্ত্ৰটোক চৌদী ৰাজপুত্ৰজনে সন্মতি জনাইছিল।
প্ৰতিবেদনখনত কোৱা হৈছে যে ২০১৭ চনৰ পৰা চৌদী ৰাজপুত্ৰজনে দেশখনৰ প্ৰতিৰক্ষা আৰু চোৰাংচোৱা সংস্থাসমূহৰ পূৰ্ণ ক্ষমতা হাতত লৈছিল, সেইবাবে তেওঁৰ সন্মতি অবিহনে হত্যাৰ ষড়যন্ত্ৰটো হাতত লোৱা কথাটোৰ ভিত্তি নাই।
আনহাতে চৌদী চৰকাৰে হত্যকাণ্ডটোৰ স’তে ৰাজপুত্ৰজন জড়িত থকাৰ বিষয়টো অস্বীকাৰ কৰি আহিছে।
উল্লেখযোগ্য যে ইতিমধ্যে যুক্তৰাষ্ট্ৰই ৭৬জন চৌদী নাগৰিকক এই ঘটনাটোৰ সন্দৰ্ভত যুক্তৰাষ্ট্ৰৰ ভিছা নিষিদ্ধ ঘোষণা কৰিছিল কিন্তু চৌদী আৰৱৰ স’তে কূটনৈতিক সম্পৰ্ক বাহাল ৰাখিবৰ বাবে ৰাজপুত্ৰজনক ৰেহাই দিছিল।
ইতিমধ্যে যুক্তৰাষ্ট্ৰৰ ৰাষ্ট্ৰপতি জ’ বিদেনে কৈছে যে ৰাজনৈতিক বিৰোধীক হত্যা কৰাটো যুক্তৰাষ্ট্ৰৰ বাবে গ্ৰহণযোগ্য নহয়। কিন্তু চৌদী আৰৱৰ স’তে থকা তেলৰ চুক্তি আৰু চৌদী-যুক্তৰাষ্ট্ৰৰ উভয়শত্ৰু ইৰাণৰ বিৰুদ্ধে কূটনৈতিক বন্ধুত্বৰ বাবে ৰাষ্ট্ৰপতিজনে চৌদী ৰাজপুত্ৰজনক হত্যাকাণ্ডটোৰ স’তে সাঙোৰা নাছিল।
এটা টেলিভিছন সাক্ষাৎকাৰত বিডেনে কয় যে আমেৰিকা যুক্তৰাষ্ট্ৰই কিছু নীতি সলনি কৰিছে, চৌদী আৰৱে যুক্তৰাষ্ট্ৰৰ স’তে সুসম্পৰ্ক ৰক্ষা কৰিবলৈ হ’লে দেশখনৰ ওপৰত আৰোপিত মানৱ অধিকাৰ দমনৰ অভিযোগসমূহৰ পৰা মুক্ত হ’ব লাগিব।
উল্লেখযো্গ্য যে প্ৰতিবেদনখন পূৰ্বৰ ৰাষ্ট্ৰপতি ডণাল্ড ট্ৰাম্পৰ কাৰ্যকালতে প্ৰস্তুত কৰা হৈছিল কিন্তু তেওঁ সেয়া ৰাজহুৱা কৰিবলে মান্তি নহৈছিল। কিন্তু বিডেনে কয় যে তেওঁ কাৰ্যভাৰ লোৱাৰ পাছতে প্ৰতিবেদনখনক গুৰুত্ব দিয়া হয়।
তদুপৰি মানৱ অধিকাৰৰ বিষয়টোৰা বাবে যুক্তৰাষ্ট্ৰই চৌদী আৰৱক মৰণাঅস্ত্ৰ যোগান বন্ধ কৰাৰো সিদ্ধান্ত লৈছে।
অৱশ্যে, চৌদী আৰৱৰ স’তে ২০১৫ চনৰ পৰমাণু চুক্তিখন বিডেন মন্ত্ৰালয়ে অক্ষুণ্ন ৰাখিছে আৰু ইছলামিক উগ্ৰবাদ, আৰৱ-ইজৰায়েলী মিত্ৰতা, ইৰাণ সম্পৰ্কত চৌদীৰ স’তে সম্পৰ্ক অব্যাহত ৰাখিছে।
