১১,২০০ মেগাৱাটৰ প্ৰস্তাৱিত ছিয়াং উজনি বহুমুখী প্ৰকল্প (SUMP)ক লৈ উত্তেজনা বৃদ্ধি পোৱাৰ মাজতে শনিবাৰে পাছিঘাটত অৰুণাচল প্ৰদেশ বিজেপিৰ সভাপতি কলিং ময়ং আৰু মৰিয়ং-গেকুৰ বিধায়ক অনি পানয়াঙৰ বাসগৃহ ভাঙি ছিঙি লণ্ডভণ্ড কৰিলে প্ৰতিবাদকাৰীয়ে।
শুকুৰবাৰে ১২ ঘণ্টীয়া বন্ধৰ সময়ত হিংসাত্মক ঘটনা সংঘটিত হোৱাৰ পিছতে পাছিঘাটত এন এইচ পি চিৰ এটা কাৰ্যালয়ত বিক্ষোভকাৰীয়ে অগ্নিসংযোগ কৰাৰ খবৰ পোৱা গৈছে। প্ৰস্তাৱিত বান্ধৰ বিৰোধিতা কৰা প্ৰতিবাদকাৰীক ছত্ৰভংগ দিয়াৰ বাবে নিৰাপত্তাৰক্ষীয়ে লাঠী আৰু কন্দুৱা গেছ ব্যৱহাৰ কৰাৰ পিছতে এই হিংসাত্মক পৰিস্থিতিৰ সৃষ্টি হয়।
পুৱা ৫ বজাৰ পৰা সমগ্ৰ ছিয়াং, আপাৰ ছিয়াং আৰু পূব ছিয়াং জিলাত বন্ধ আৰম্ভ হয়। প্ৰতিবাদকাৰীসকলে এই প্ৰকল্পৰ বিৰোধিতা কৰি গ্ৰেপ্তাৰ হোৱা ১০ জন কৰ্মীক মুকলি কৰি দিয়াৰ লগতে অঞ্চলটোত নিয়োজিত নিৰাপত্তা বাহিনী প্ৰত্যাহাৰৰ দাবী জনায়।
ছিয়াঙৰ আৰক্ষী অধীক্ষক কামদম ছিখমে জনোৱা মতে, পুৱা প্ৰায় ৭ বজাত আপাৰ ছিয়াং জিলাৰ গেকু আৰু কমকাৰৰ পৰা প্ৰায় ১৫০ৰ পৰা ২০০জন প্ৰতিবাদকাৰীয়ে ছিয়াং জিলাৰ দিটে-ডাইমেত সমবেত হয়।
তেওঁ অভিযোগ কৰে যে তেওঁলোকে আৰক্ষীৰ বেৰিকেডক ক্ষতিগ্ৰস্ত কৰিবলৈ চেষ্টা কৰিছিল, শিলগুটি নিক্ষেপ কৰিছিল আৰু নিষেধাজ্ঞামূলক আদেশ উলংঘা কৰিছিল, যাৰ ফলত আৰক্ষীয়ে কন্দুৱা গেছৰ গোলা নিক্ষেপ কৰে।
আন এজন আৰক্ষী বিষয়াই কয়, ‘এই সংঘৰ্ষত আহত চাৰিগৰাকী মহিলাক চিকিৎসালয়ত ভৰ্তি কৰোৱা হৈছে।
প্ৰতিবাদকাৰীসকলে অভিযোগ কৰে যে নিৰাপত্তাৰক্ষীয়ে অত্যধিক বল প্ৰয়োগ কৰি তেওঁলোকক ছত্ৰভংগ দিওৱাৰ ফলত কেইবাজনো বিক্ষোভকাৰীয়ে কন্দুৱা গেছৰ গোলাত আঘাতপ্ৰাপ্ত হোৱাৰ লগতে উশাহ-নিশাহ লোৱাত অসুবিধা পাইছে।
আৰক্ষীৰ এই কাৰ্যক লৈ স্বতন্ত্ৰ তদন্তৰ আহ্বান জনাইছে। ছিখোমে অৱশ্যে ছিয়াং জিলাৰ অন্যান্য প্ৰান্তত বন্ধ শান্তিপূৰ্ণভাৱে পাৰ হোৱা বুলি কয়।
পূৱ ছিয়াং জিলাৰ মেবোৰ ৰানাঘাট দলঙৰ সমীপতো হিংসাত্মক ঘটনা সংঘটিত হোৱাৰ উপৰি কেইবাজনো লোক আহত হোৱাৰ লগতে কমেও ৭খন বাহনৰ ক্ষতিসাধন হোৱা বুলি বিষয়াসকলে জানিবলৈ দিয়ে।
স্থানীয় নিউজ চেনেলৰ কেমেৰামেন এজন কন্দুৱা গেছৰ গোলা ভৰিত খুন্দা মৰাত আঘাতপ্ৰাপ্ত হোৱাৰ খবৰ পোৱা গৈছে বুলি সূত্ৰই প্ৰকাশ কৰিছে। আৰক্ষীৰ দুখন বাহনতো অগ্নিসংযোগ কৰা বুলি জানিব পৰা গৈছে।
পূব ছিয়াঙৰ আৰক্ষী অধীক্ষক পংকজ লাম্বাই বাৰে বাৰে কৰা ফোনত কোনো সঁহাৰি নিদিয়াৰ বিপৰীতে আপাৰ ছিয়াঙৰ উপ আয়ুক্ত অশোক তাজোৱে কয় যে তেওঁৰ জিলাত বন্ধ শান্তিপূৰ্ণ হৈ আছে।
বন্ধৰ ফলত সমগ্ৰ ছিয়াং আৰু আপাৰ ছিয়াং জিলা আৰু পূব ছিয়াঙৰ কিছু অংশত স্বাভাৱিক জীৱন ব্যাহত হয়, দোকান আৰু অন্যান্য ব্যৱসায়িক প্ৰতিষ্ঠান বন্ধ হৈ পৰে আৰু বহু বাসিন্দা ঘৰৰ ভিতৰতে সোমাই থাকে।
