দেশখনত সংঘটিত হৈছে এক শিহৰণকাৰী গুলীচালনাৰ ঘটনা। গীৰ্জাত প্ৰাৰ্থনাৰ সময়ত হঠাৎ নিৰ্বিচাৰ গুলীচালনাত বহু লোক নিহত হয়। খবৰ অনুসৰি শুকুৰবাৰে জৰ্ডানৰ কাৰাক চহৰৰ এটা গীৰ্জাৰ ভিতৰত এজন অচিনাক্ত আক্ৰমণকাৰীৰ গুলীচালনাত ৭ জন লোক নিহত হোৱাৰ লগতে ৩৪ জন আহত হয়।
অৱশ্যে এই আক্ৰমণ কোনে সংঘটিত কৰিছে বা ইয়াৰ উদ্দেশ্য কি আছিল সেয়া এতিয়াও স্পষ্ট হোৱা নাই।
বাতৰি অনুসৰি, জৰ্ডানৰ ৰাজধানী আম্মানৰ পৰা প্ৰায় ১৮০ কিলোমিটাৰ দক্ষিণে অৱস্থিত কাৰাক চহৰৰ গ্ৰীক অৰ্থডক্স গীৰ্জাত এই গুলীচালনা সংঘটিত হয়। জৰ্ডান চৰকাৰৰ মুখপাত্ৰ মহম্মদ আল মোমানীয়ে মৃত আৰু আহত লোকৰ সংখ্যাৰ খবৰ দিয়ে। এই ঘটনাৰ তদন্ত অব্যাহত ৰাখিছে নিৰাপত্তা সংস্থাই।
কাৰাকত এটা খ্ৰীষ্টান সংখ্যালঘু জনগোষ্ঠীও আছে। অৱশ্যে মৃত আৰু আহত কোন সম্প্ৰদায়ৰ আছিল বা আক্ৰমণকাৰীয়ে কাক লক্ষ্য কৰি লৈছিল সেই কথা এতিয়াও কৰ্তৃপক্ষই সদৰী কৰা নাই।
ভাইৰেল হোৱা এটা ভিডিঅ’ত দেখা গৈছে যে গীৰ্জাঘৰৰ ওচৰত নিৰাপত্তা বাহিনী নিয়োজিত হৈ সন্দেহযুক্ত লোকক খেদি ফুৰিছে। কাৰাকৰ হামুদ গীৰ্জাত শেষকৃত্যৰ শোভাযাত্ৰাৰ সময়ত বন্দুকধাৰীয়ে গাড়ীৰ পৰা নামি গুলীচালনা কৰে। ফুটপাথৰ পৰা তিনিজন লোকে গীৰ্জালৈ লক্ষ্য কৰি গুলীচালনা কৰে। আক্ৰমণকাৰীসকলে গীৰ্জাৰ প্ৰৱেশদ্বাৰৰ ফালে দৌৰি যোৱাৰ আগেয়ে গছ আৰু সৰু দেৱালৰ আঁৰত লুকাই আছিল।
কেইবাজনো প্ৰত্যক্ষদৰ্শীয়ে জনোৱা মতে, ৰাইফল আৰু পিষ্টল লৈ কমেও দুজন লোকে উপস্থিত কেইবা ডজন লোকৰ ওপৰত কেইমিনিটমান ধৰি গুলীচালনা কৰে। জৰ্ডানৰ ৰজা আব্দুল্লাই কয় যে এই আক্ৰমণৰ আঁৰত থকা লোকসকলক “কঠোৰতম শাস্তি” বিহা হ’ব।
তেওঁ এক বিবৃতিত কয় যে “কাৰাকত সন্ত্ৰাসবাদী আক্ৰমণৰ কঠোৰ প্ৰত্যুত্তৰ দিয়া হ’ব। যিসকলে ভ্ৰান্ত ধাৰণা পোষণ কৰে যে তেওঁলোকে তেওঁলোকৰ গুলীৰে জৰ্ডানৰ জনসাধাৰণক বিভাজিত কৰিব পাৰিব, তেওঁলোকে আমাৰ ঐক্যৰ সন্মুখত টিকিব নোৱাৰিব।”
আটাইতকৈ গুৰুত্বপূৰ্ণ কথাটো হ’ল জৰ্ডানত এনে আক্ৰমণ বিৰল, য’ত দেশখন বহুলাংশে সুস্থিৰ। অৱশ্যে জৰ্ডানৰ কৰ্তৃপক্ষই বিগত কেইবছৰত ইছলামিক উগ্ৰপন্থীৰ কেইবাটাও আক্ৰমণৰ চেষ্টা বিফল কৰা বুলি প্ৰকাশ কৰিছে।
