পুৰণিগুদামত ডাম্পাৰ-মাৰাঞ্জোৰ মাজত সংঘৰ্ষ : আহত পাঁচ জন; ১ ঘণ্টা ধৰি মাৰাঞ্জোত আবদ্ধ বৃদ্ধাসহ চালক

ডাম্পাৰৰ অবাধ দৌৰাত্ম্যৰ বাবে যেন সম্প্ৰতি দুৰ্ঘটনাৰ হটস্পটলৈ পৰ্যবসিত হৈছে পুৰণিগুদাম অঞ্চলৰে পাৰহৈ যোৱা নিৰ্মীয়মান ৩৭ নং ৰাষ্ট্ৰীয় ঘাইপথ চোৱা।

দেওবাৰে নিশাও পুৰণিগুদামৰ কাষৰিগাঁৱত সংঘটিত হয় এক ভয়ংকৰ পথ দুৰ্ঘটনা।

ঘটনাৰ বিৱৰণীৰ নগাঁও অভিমূখী মহেন্দ্ৰা মাৰাঞ্জো আৰু দ্ৰুতবেগী ডাম্পাৰৰ মাজত হোৱা মুখামুখি সংঘৰ্ষৰ ফলত আহত হয় পাঁচজনকৈ লোক।

প্ৰায় এঘণ্টা ধৰি দুৰ্ঘটনাগ্ৰস্ত মাৰাঞ্জো খনতে আৱদ্ধহৈ থাকে এগৰাকী বৃদ্ধাসহ মাৰাঞ্জোখনৰ চালকজন।

বহু চেষ্টাৰ অন্তত স্থানীয় ৰাইজে কুঠাৰে গাড়ী কাটি উদ্ধাৰ কৰিবলৈ সক্ষম হয় গুৰুতৰভাবে আহত দুয়োজন লোককে।

AS-01EF-9133 নম্বৰৰ মাৰাঞ্জোখনৰ পৰা ৰাইজে উদ্ধাৰ কৰা লোক দুজনৰ লগতে মাৰাঞ্জোখনত অহা আহত আন তিনিজন লোককো সংকটজনক অৱস্থাত নগাঁও অসামৰিক চিকিৎসালয়লৈ প্ৰেৰণ কৰে ঘটনাস্থলিত উপস্থিত পুৰণিগুদাম আৰক্ষীয়ে।

দুৰ্ঘটনাটো সংঘটিত কৰিয়ে ঘটনাস্থলীৰ পৰা পলায়ন কৰে AS-02BC-3324 নম্বৰৰ ডাম্পাৰখনৰ চালক-হেণ্ডিমেনে।

ইফালে ঠেক নিৰ্মীয়মান ফ’ৰলেন যুক্ত ৰাজপথ চোৱাৰ বাবে তথা ডাম্পাৰৰ দৌৰাত্ম্যৰ বাবে নিতৌ অঞ্চলটোত দুৰ্ঘটনা সংঘটিত হৈ আহাৰ এক গুৰুত্বপূৰ্ণ অভিযোগ উত্থাপন কৰিছে ক্ষুব্ধ স্থানীয় ৰাইজে।

দুৰ্ঘটনাটোৰ ফলত নিশা ৰাজপথ চোৱাৰ দুয়ো দিশে তীব্ৰ যানজঁট সৃষ্টি হোৱা পৰিলক্ষিত হয় দেওবাৰে নিশাৰ ভাগত।