অসমৰ বিশিষ্ট সংগীতজ্ঞ প্ৰভাত শৰ্মাৰ পৰলোকপ্ৰাপ্তি ঘটিছে।
পৰিয়ালৰ সূত্ৰ অনুসৰি মংগলবাৰে পুৱা ৬ বজাত গুৱাহাটীৰ অম্বিকাগিৰী নগৰৰ নিজা বাসভৱনত বিশিষ্ট সংগীতজ্ঞগৰাকীৰ শ্বাস-প্ৰশ্বাস বন্ধ হৈ মৃত্যু হয়।
মৃত্যুৰ সময়ত প্ৰভাত শৰ্মাৰ বয়স আছিল প্ৰায় ৯০ বছৰ।
প্ৰভাত শৰ্মা আছিল একেধাৰে এগৰাকী ভাৰতীয় সংগীতজ্ঞ, বাঁহী বাদক আৰু লোকসংগীতৰ সাধক।
৭ জুলাই ১৯৩৫ চনত বৰপেটাত জন্মগ্ৰহণ কৰিছিল প্ৰভাত শৰ্মাই। প্ৰভাত শৰ্মাই বৰপেটা চহৰৰ বিদ্যাপীঠত দশম শ্ৰেণীলৈ শিক্ষা গ্ৰহণ কৰে আৰু তাৰ পিছত তেওঁ সুন্দৰীদিয়া সত্ৰৰ গংগাধৰ দেৱ মিশ্ৰ আৰু সত্য কৃষ্ণ দেৱ মিশ্ৰৰ পৰা সত্ৰীয় সংগীতকে ধৰি বৰগীতৰ শিক্ষা গ্ৰহণ কৰে।
ভাৰতীয় সংগীতৰ প্ৰতি ৰাপ থকা শৰ্মাই অসমৰ লোকসংগীতৰো শিক্ষা গ্ৰহণ ইয়াৰ চৰ্চা কৰিবলৈ আৰম্ভ কৰে।
বিশিষ্ট সংগীত সাধক গৰাকীয়ে তেওঁ ১৯৬০ৰ দশকৰ পৰা ১৯৯০ৰ দশকৰ শেষচোৱালৈকে অসম চৰকাৰৰ তথ্য আৰু গণসংযোগ বিভাগত ষ্টাফ আৰ্টিষ্ট আছিল।
১৯৭৩ চনত তেওঁ আকাশবাণী গুৱাহাটী কেন্দ্ৰত যোগদান কৰি ১৯৯৮ চনত চাকৰিৰ পৰা অৱসৰ গ্ৰহণ কৰিছিল।
প্ৰভাত শৰ্মা অসমৰ থলুৱা বাদ্যযন্ত্ৰীক লৈ ‘পাঞ্চজন্য শংখধ্বনি’ নামৰ এটি সুৰসমলয় দল গঠন কৰিছিল। পিছলৈ ইয়াক ‘দেৱগান্ধাৰ’ নামেৰে নামকৰণ কৰা হয়।
‘ব্লেকমানী’, ‘ব্লেকমানী’, ‘সন্তান’, ‘সন্ধ্যাৰাগ’, ‘সাৰথি’, ‘আপোনজন’, ‘মোহমুক্তি’, ‘অনল’,’কদমতলে কৃষ্ণ নাচে’, ‘শ্ৰীমন্ত শংকৰদেৱ’ ইত্যাদি অসমীয়া ছবিৰ সংগীত পৰিচালনা কৰিছিল প্ৰভাত শৰ্মাই।
দূৰদৰ্শন কেন্দ্ৰ গুৱাহাটীত প্ৰচাৰিত ধাৰাবাহিক ‘পথৰুঘাটে ৰিঙিয়ায়’ আৰু ‘বৃকোদৰ বৰুৱাৰ বিয়া’তো প্ৰভাত শৰ্মাই সংগীত পৰিচালনা কৰিছিল।
২০০১ চনত তেওঁক অসম চৰকাৰে ‘শিল্পী দিৱস বঁটা’ প্ৰদান কৰে। অসমীয়া লোকসংগীতৰ ক্ষেত্ৰলৈ আগবঢ়োৱা অৱদানৰ স্বীকৃতি স্বৰূপে ২০০৪ চনত তেওঁ ‘সংগীত নাটক একাডেমী বঁটা’ লাভ কৰিছিল।
অসমৰ বিশিষ্ট সংগীত শিল্পী তৰালি শৰ্মাৰ প্ৰভাত শৰ্মাৰে সুযোগ্যা কন্যা।
বিশিষ্ট সংগীতজ্ঞগৰাকীৰ মৃত্যুৱে তেওঁৰ অসংখ্য গুমমুগ্ধক শোকস্তব্ধ কৰি তুলিছে।
