শ্ৰমিক অধিকাৰ কৰ্মী নদীপ কৌৰে সোমবাৰে কয় যে তেওঁ কাৰাগাৰৰ পৰা উলাই আহিলেও সংগ্ৰাম এতিয়াও শেষ হোৱা নাই।
‘মজদুৰ অধিকাৰ সংগঠন’ৰ সভাপতি শিৱ কুমাৰ আৰু মোদী চৰকাৰে আটক কৰি ৰখা অন্যান্য ‘ৰাজনৈতিক কাৰাবন্দী’সকলৰ মুক্তিৰ বিষয়টো লৈ ৩৭টা সংগঠনে আয়োজন কৰা এখন সংবাদমেলত নদীপ কৌৰে কয় যে ৰাষ্ট্ৰৰ দমননীতি বাঢ়ি গৈ আছে।
কৌৰৰ লগতে সংবাদমেলখনত শিৱ কুমাৰৰ দেউতাক ৰাজৱীৰ কুমাৰ, সাংবাদিক মনদীপ পুনিয়া আৰু সংবাদমেলখন আয়োজন কৰা কৃষক-শ্ৰমিক সংগঠনসমূহৰ প্ৰতিনিধিসকলেও বক্তব্য ৰাখে।
কৌৰে তেওঁৰ কাৰাবন্দী সময়ছোৱাত সাংবাদিকসকলৰ ভূমিকাক ধন্যবাদ জনাই কয় যে কাৰাগাৰৰ পৰা বাহিৰ হৈ আহিলেও, সংগ্ৰামখন শেষ হোৱা নাই।
‘‘ৰাষ্ট্ৰৰ নিপীড়ণ বাঢ়ি গৈ আছে। মুছলিম, দলিত, আদিবাসী অথবা শিখ- যিসকলে তেওঁলোকৰ অধিকাৰৰ বাবে মাত মাতিছে, তেওঁলোকক কঠোৰ আইনৰ অধীনত কাৰাবন্দী কৰা হৈছে। ইয়াৰ পৰা প্ৰমাণ হয় যে ৰাষ্ট্ৰই ভয় খাইছে।’’ কৌৰে কয়।
তদুপৰি তেওঁ দাবী কৰে যে কাৰাগাৰত কাৰাবন্দী হৈ থকা মহিলা কয়দীসকলৰ স’তে তেওঁ কথা পাতোতে তেওঁলোকে কৌৰক জনাইছিল যে কাৰাগাৰত ধৰ্ষণ আৰু অত্যাচাৰ তেনেই সাধাৰণ কথা।
‘‘আৰক্ষী হৈছে ৰাষ্ট্ৰৰ মাত্ৰ এটা আহিলা। তেওঁলোক যন্ত্ৰ। তেওঁলোকৰ নিজাকৈ মগজু নাই।’’ কৌৰে ক্ষোভেৰে কয়।
উল্লেখযোগ্য যে কৌৰেও আৰক্ষীৰ বিৰুদ্ধে তেওঁক অত্যাচাৰ কৰাৰ অভিযোগ উত্থাপন কৰিছিল।
আনহাতে কৌৰে স্পষ্ট কৰি দিয়ে যে তেওঁ কোনো ৰাজনৈতিক দলক সমৰ্থন নকৰে।
কৃষক আন্দোলনক বিজেপিয়ে খালিস্তানৰ স’তে একলগ কৰা অভিযোগটোক নাকচ কৰি কৌৰে কয় যে এখন পৃথক ৰাষ্ট্ৰ স্থাপন কৰাতকৈ কৃষকসকলে শোৱাৰ আগত পেট ভৰাই খাবলৈ বিচাৰে।
‘‘আমাক হিন্দু, মুছলিম আৰু শিখৰ মাজত ভাগ ভাগ কৰি চৰকাৰে লাভ উঠাইছে। তেওঁলোকে কয় যে মুছলিমসকলৰ বাবে হিন্দু বিপদত পৰিছে। কিন্তু যেতিয়া আপুনি ভালদৰে চায়, দেখিব যে এজন সাধাৰণ লোকে কিছু খাদ্য আৰু আশ্ৰয়হে বিচাৰে।’’ কৌৰে কয়।
আনহাতে কাৰাবাস খাটি থকা ‘মজদুৰ অধিকাৰ সংগঠন’ৰ সভাপতি শিৱ কুমাৰৰ দেউতাক ৰাজৱীৰ কুমাৰে কয় যে কাৰাবন্দী হোৱাৰ পাছত তেওঁলোকে পুত্ৰৰ কোনো খবৰ লাভ কৰা নাই।
উল্লেখযোগ্য যে কুমাৰক হাৰিয়ানা আৰক্ষীয়ে কুণ্ডলী ইণ্ডাষ্ট্ৰিয়েল এচ’চিয়েচনৰ মালিকক আক্ৰমণ কৰাৰ অভিযোগত ১৬ জানুৱাৰীৰ আটক কৰি ৰাখিছে।
কুমাৰক আৰক্ষীয়ে শাৰিৰীক অত্যাচাৰ চলোৱা বুলিও ৰাজৱীৰে অভিযোগ উত্থাপন কৰে।
আইছা, এআইএছএফ, এছএফআই, ভীম আৰ্মী, কৰ্ণাটক জনশক্তি, মজদুৰ অধিকাৰ সংগঠনকে ধৰি কেইবাটাও সংগঠনে আয়োজন কৰা সংবাদমেলখনত চিপিআই(এমএল)ৰ সুচেতা দে’, ভাৰতীয় কিষাণ একতাৰ যোগিন্দৰ সিং, বহুজন সমাজবাদী মঞ্চৰ সঞ্জীৱ মাথু, দিল্লী বিশ্ববিদ্যালয়ৰ নন্দীতা নাৰায়ণেও বক্তব্য ৰাখে।
