পত্নী সম্পত্তি অথবা দাসী নহয় যে স্বামীয়ে তেওঁক লগত জোৰ কৰি ৰাখিব পাৰিব। দেশৰ সৰ্বোচ্চ ন্যায়ালয়ে এইদৰে কয়।
মংগলবাৰে উচ্চতম ন্যায়ালয়ে এগৰাকী ব্যক্তিয়ে তেওঁৰ পত্নীক পুনৰ লগত ৰাখিবলৈ তৰা এক গোচৰৰ শুনানি গ্ৰহণ কৰি কয় যে পত্নী সম্পত্তি বা দাসী নহয় যে স্বামীয়ে তেওঁৰ লগত জোৰ কৰি ৰাখিব।
সৰ্বোচ্চ ন্যায়ালয়ে লগতে আৰু কয় যে পত্নীক লগত ৰাখিবলৈ স্বামীয়ে জোৰ কৰিবও নোৱাৰিব।
গোচৰটো শুনানি গ্ৰহণ কৰা ন্যায়াধীশ সঞ্জয় কিষাণ কৌল আৰু হেমন্ত গুপ্তাৰ খণ্ড বিচাৰপীঠে কয়, “আপুনি কি ভাবে? এগৰাকী মহিলা সম্পত্তি নেকি যে আমি এই নিৰ্দেশ দিব পাৰো? পত্নী সম্পত্তি নেকি যে তেওঁক আপোনাৰ লগত থাকিবলৈ নিৰ্দেশ দিব পাৰো?”
গোৰখপুৰ পাৰিবাৰিক আদালতত হিন্দু বিবাহ আইন(HMA)ৰ ধাৰা ৯ৰ অধীনত পত্নীক পুনৰ গ্ৰহণ কৰাৰ বাবে এজন বিবাহিত লোকে ২০১৫ চনৰ এটা ৰায়ৰ বিৰুদ্ধে তৰা গোচৰৰ শুনানি গ্ৰহণ কৰি উচ্চতম ন্যায়ালয়ে এইদৰে কয়।
উল্লেখ্য যে ২০১৩ চনত বিয়া হোৱাৰ পিছত স্বামীয়ে পত্নীক যৌতুক বিচাৰি শাৰীৰিক আৰু মানসিক অত্যাচাৰ চলোৱাৰ অভিযোগ উত্থাপন কৰি তাৰপৰা ৰক্ষা পোৱাৰ লগতে পৃথক হোৱাৰ বাবে ২০১৫ চনত আদালতৰ দাৰস্থ হৈছিল।
গোৰখপুৰ আদালতে স্বামীগৰাকীক পত্নীক ভৰণপোষণৰ বাবে মাহে ২০ হাজাৰ টকা দিবলৈ নিৰ্দেশ দিছিল আৰু স্বামীয়ে ইয়াৰ পিছতে পত্নীক পুনৰ ঘূৰাই অনাৰ আইনী প্ৰক্ৰিয়াৰ বাবে পাৰিবাৰিক আদালতত আবেদন কৰে।
গোৰখপুৰ আদালতে স্বামীগৰাকীৰ পক্ষে ৰায় প্ৰদান কৰিলেও পত্নীয়ে স্বামীৰ লগত থাকিবলৈ সন্মত নৈ ভৰণ পোষণৰ বাবে মাহিলি উক্ত ২০ হাজাৰ টকা দাবী কৰে। স্বামীয়ে পত্নীক এই ধন দিবলৈ অমান্তি হৈ পত্নীক নিজৰ সৈতে ৰাখিবলৈ পুনৰ এলাহাবাদ উচ্চ ন্যায়ালয়ৰ দাৰস্থ হয়। এলাহাবাদ উচ্চ ন্যায়ালয়ে পত্নীৰ সপক্ষে ৰায় প্ৰদান কৰাত স্বামীগৰাকীয়ে উচ্চতম ন্যায়ালয়ৰ দাৰস্থ হয়।
উচ্চতম ন্যায়ালয়ে এই গোচৰৰ শুনানি গ্ৰহণ কৰাৰ সময়ত স্বামীগৰাকীৰ অধিবক্তাই পাৰিবাৰিক আদালতৰ দোহাই দি পত্নীগৰাকীক স্বামীৰ ওচৰলৈ প্ৰেৰণ কৰিবলৈ আদালাতক আবেদন কৰে।
তেতিয়াই উচ্চতম ন্যায়ালয়ে প্ৰশ্ন কৰে, “নাৰী কি সম্পত্তি নেকি? পত্নী কি স্বামীৰ সম্পত্তি নেকি? আপুনি আমাক এনে এটা আদেশ দিবলৈ কৈছে যে য’ত থাকিবলৈ পত্নীগৰাকী অমান্তি হৈছে, একোটা সম্পত্তিৰ দৰে।” শীৰ্ষ আদালতে স্বামীৰ আবেদন খাৰিজ কৰি পত্নীৰ ভৰণ পোষণৰ বাবে মাহিলি ধন দিবলৈ স্বামীক নিৰ্দেশ দিয়ে।
