ৰাষ্ট্ৰীয় জনতা দল (আৰ.জে.দি.) আৰু সমাজবাদী পাৰ্টিৰ পাছত এইবাৰ শিৱসেনাইও মমতা বেনাৰ্জীৰ প্ৰতি সমৰ্থন ঘোষণা কৰিছে।
পশ্চিমবংগৰ আগন্তুক বিধানসভাত শিৱ সেনাই প্ৰতিদ্বন্দিতা নকৰে বুলিও দলটোৱে জানিবলৈ দিছে।
মমতা বেনাৰ্জীক ‘প্ৰকৃত বেংগল বাঘিনী’ হিচাপে অভিহিত কৰি শিৱ সেনাই কৈছে যে তৃণমূল কংগ্ৰেছক তেওঁলোকে আকুণ্ঠ সমৰ্থন আগবঢ়াইছে।
শিৱ সেনাৰ নেতা তথা ৰাজ্য সভাৰ সাংসদ সঞ্জয় ৰাউটে এটা টুইটযোগে জানিবলৈ দিছে যে মমতা বেনাৰ্জীক সমৰ্থনৰ বিষয়টো শিৱ সেনাৰ সভাপতি তথা মহাৰাষ্ট্ৰৰ মুখ্যমন্ত্ৰী উদ্ধৱ ঠাকৰেৰ স’তে এক আলোচনাৰ অন্তত ঠিৰাং কৰা হয়।
‘‘আমি মমতা দিদীক এটা ‘গৰ্জনমুখৰ’ সাফল্যৰ বাবে শুভেচছা জনাইছে, কাৰণ আমি বিশ্বাস কৰো তেওঁৱেই হৈছে প্ৰকৃত বেংগল বাঘিনী’’। টুইটোত সাংসদ ৰাউটে এইদৰে লিখে।
শিৱসেনাৰ পশ্চিম বংগৰ শাখা সভাপতি অশোক সৰকাৰেও দলে তৃণমূল কংগ্ৰেছক সমৰ্থন জনোৱাৰ প্ৰস্তাৱটোক আদৰণি জনাইছে।
আনহাতে তৃণমূল কংগ্ৰেছৰ মুখপাত্ৰ তথা ৰাজ্যসভা সাংসদ ডেৰেক অ’ ব্ৰিয়েনে ৰাউটৰ টুইটটো ৰিটুইট কৰি ধন্যবাদ জনাইছে।
