শুনিবলৈ আচৰিত যেন লাগিলেও এটা মেকুৰীৰ আক্ৰমণৰ পৰা ৰক্ষা পাবলৈ জৰুৰীকালীনভাৱে বিমানবন্দৰত এখন বিমান অৱতৰণ কৰাবলগীয়া হ’ল।
কাটাৰমুখী এখন বিমানত সংঘটিত হৈছে এই ঘটনা। মেকুৰীৰৰ আক্ৰমণৰ পৰা ৰক্ষা পাবলৈ বাধ্য হৈ সেই বিমানখন ছুডানৰ ৰাজধানী খাৰতুমত অৱতৰণ কৰোৱা হয়। তাৰপাছতহে তাৰপৰা বিমানখনে যাত্ৰা কৰে।
বাতৰি অনুসৰি, বিমানখনৰ ভিতৰত সোমাই ইয়াৰ পাইলটৰ পৰা আৰম্ভ কৰি আন কেইবাজনৰো ওপৰত আক্ৰমণ চলায় মেকুৰীটোৱে। সেইকাৰণেই আতংকিত হৈ ততাতয়াকৈ বিমানখন অৱতৰণ কৰোৱা হয়।
নিশা বিমানবন্দৰত ৰৈ থকাৰ সময়তে কেনেবাকৈ মেকুৰীটো বিমানখনৰ ভিতৰত সোমাই পৰাৰ সন্দেহ কৰা হৈছে।
স্থানীয় সংবাদ মাধ্যমৰ বাতৰি অনুসৰি মেকুৰীটোক প্ৰথমতে এজন ক্ৰু সদস্যই দেখা পায়। খাৰতুমৰ পৰা বিমানখন এৰাৰ আধা ঘন্টাৰ ভিতৰতে মেকুৰীটো সকলোৰে সন্মুখীনলৈ ওলাই আহে আৰু সকলোকে আক্ৰমণৰ লক্ষ্য কৰি লয়।
মেকুৰীটোক কৰায়ত্ত কৰাৰ চেষ্টা কৰা হয় যদিও কোনোমতে সেয়া কৰিব পৰা নগ’ল। কোনোৰকমে বিমানখনত সোমাই পৰাৰ পাছত মেকুৰীটো শুই পৰিছিল আৰু বিমানখন উৰণৰ পাছত সাৰ পাই আৰোহীৰ ওপৰত আক্ৰমণ চলাবলৈ আৰম্ভ কৰে।
বিমানখন অৱতৰণ কৰাৰ পাছত বিমানখনৰ ভিতৰৰ পৰা মেকুৰীটোক উলিয়াই অনা হয়।
