২০২১ৰ বিধানসভাৰ নিৰ্বাচনৰ দিন ঘোষণা কৰাৰ লগে লগে ৰাজ্যৰ প্ৰতিটো ৰাজনৈতিক মিত্ৰজোঁটৰ দলসমূহৰ মাজত আসনকেন্দ্ৰিক সংঘাতে দেখা দিছে।
শাসকীয় মিত্ৰজোঁটৰ আসন ভাগ বতৰাৰ পিছত দুই দল ক্ৰমে ভাৰতীয় জনতা পাৰ্টি আৰু অসম গণ পৰিষদৰ মাজত আভ্যন্তৰীণ কন্দলে গা কৰি উঠাৰ সমান্তৰালভাৱে কংগ্ৰেছ নেতৃত্বাধীন মহাজোঁটতো আৰম্ভ হৈছে আসনকেন্দ্ৰিক মতানৈক্য।
প্ৰধানতঃ কংগ্ৰেছ এআইয়ুডিএফৰ মাজত আসনকেন্দ্ৰিক দ্বন্দ্ব আৰম্ভ হোৱাৰ পিছতে কংগ্ৰেছ আৰু আঞ্চলিক গণ মৰ্চাৰ মাজতো যে আসনকেন্দ্ৰিক মতানৈক্যৰ সৃষ্টি হৈছে সেয়া স্পষ্ট হৈ পৰিছে।
আঞ্চলিক গণ মৰ্চাই দাবী কৰা অনুসৰি দলটোৱে মহাজোঁটৰ পৰা মাত্ৰ দুখন আসন বিচাৰিলেও কংগ্ৰেছে দুয়োখন আসনকে গণ মৰ্চাক এৰিব দিবলৈ সন্মত নহ’ল।
গণ মৰ্চাৰ নেতৃত্বই প্ৰকাশ কৰা অনুসৰি দলটোৱে কংগ্ৰেছৰ পৰা বটদ্ৰৱা আৰু বোকাখাত সমষ্টি দুটা বিচাৰিছিল। কিন্তু কংগ্ৰেছে এই দুটা সমষ্টি গণ মৰ্চাক এৰি নিদিয়াত তেওঁলোকে নিজা প্ৰাৰ্থী থিয় কৰোৱাব বুলি ঘোষণা কৰিছে।
দেওবাৰে হোটেল লিলিত এক সংবাদমেল আয়োজন কৰি গণ মৰ্চা মুখ্য আহ্বায়ক তথা সাংসদ অজিত কুমাৰ ভূঞাই কয় “আমি বটদ্ৰৱাৰ পৰা প্ৰাৰ্থীত্ব বিচাৰিছিলো, কিন্তু মহাজোঁটে আমাৰ কথা নাৰাখিলে। সেইবাবে আমি আমাৰ প্ৰাৰ্থী লাচিত বৰদলৈক বটদ্ৰৱাৰ প্ৰাৰ্থী হিচাপে আগবঢ়াইছো। তাৰে লগতে বোকাখাত আগবঢ়াইছো পৰা প্ৰণৱ দলেক।”
ইফালে মহাজোঁটৰ মাজত ঐক্যৰ যে অভাৱ সেই কথা স্পষ্টৰূপত প্ৰকাশ পাইছে গণ মৰ্চাৰ মুখ্য আহ্বায়ক অজিত কুমাৰ ভাষ্যত।
মহাজোঁটক লৈ ভুঞাই কয় “মহাজোঁট যি ধৰণে আগবাঢ়িব লাগিছিল সেইদৰে আগবাঢ়িব পৰা নাই।”
নিৰ্বাচনৰ পূৰ্বে মহাজোঁটৰ মাজত সৃষ্টি হোৱা মতানৈক্য স্পষ্টৰূপত বৰ্হিপ্ৰকাশ ঘটাৰ পিছত মহাজোঁটে কিদৰে বিজেপি-অগপ-য়ুপিপিএল বিৰোধী ভোটক একত্ৰিত কৰি শাসকীয় মিত্ৰজোঁটক প্ৰত্যাহ্বান জনাব সেয়া পৰৱৰ্তী সময়ত লক্ষণীয় হ’ব।
