ব্ৰহ্মপুত্ৰ নদীৰ ওপৰত বৃহৎ নদীবান্ধ নিৰ্মাণ কৰি বিদ্যুৎ উৎপাদনৰ পৰিকল্পনা চূড়ান্ত কৰিছে চীনে। এই বাতৰিয়ে এতিয়া ভাৰত আৰু চীনৰ মাজত নতুন সংঘাতৰ সৃষ্টি কৰাৰ শংকা বৃদ্ধি পাইছে।
সোমবাৰে তিব্বতৰ কমিউনিষ্ট পাৰ্টিয়ে চীনে শীঘ্ৰেই এই কাম আৰম্ভ কৰা উচিত বুলি জনাই দিছে। যোৱা সপ্তাহতেই চীনৰ পঞ্চবাৰ্ষিক পৰিকল্পনাত এই জলবিদ্যুৎ প্ৰকল্প অন্তৰ্ভুক্ত কৰা হৈছে।
ব্ৰহ্মপুত্ৰৰ ওপৰৰ গতিপথত বান্ধ নিৰ্মাণ কৰিলে ভাৰতত জলসংকট সৃষ্টি হ’ব পাৰে আৰু অসম তথা অৰুণাচলত প্ৰবল বানপানী আৰু কৃষিকৰ্ম বিপৰ্যস্ত হৈ পৰাৰ আশংকা আছে।
যোৱা ফেব্ৰুৱাৰিত সংসদত কেন্দ্ৰীয় বৈদেশিক ৰাজ্যমন্ত্ৰী ভি মুৰলীধৰণে দেশৰ স্বাৰ্থ আগত ৰাখি ব্ৰহ্মপুত্ৰকে ধৰি চীনৰ পৰা ভাৰতলৈ অহা নদীসমূহক লৈ বেইজিঙৰ সৈতে কূটনৈতিক পৰ্যায়ত আলোচনা চলা বুলি জানিবলৈ দিছিল।
চীনৰ ফালৰ পৰা বাৰে বাৰে আশ্বস্ত কৰিবলৈ চেষ্টা কৰি অহা হৈছে যে এই বান্ধ নিৰ্মাণ প্ৰকল্পই কোনোধৰণে ভাৰতৰ ক্ষতি নকৰে। নদীৰ গতিপথ সলনি কৰাৰ কোনো পৰিকল্পনা তেওঁলোকৰ নাই বুলিও কৈ অহা হৈছে।
তথাপি ব্ৰহ্মপুত্ৰৰ ওপৰত চীনৰ কাৰ্যকলাপ সন্দৰ্ভত তীক্ষ্ণ দৃষ্টি ৰাখিছে ভাৰতে।
যোৱা বছৰ লাডাখ সীমান্তত চীনৰ আগ্ৰাসননলৈ দেশ দুখনৰ মাজত অৱনতি ঘটা সম্পৰ্কৰ পাছত বহু পানী ঘোলা হ’ল। বহু আলোচনা-বিলোচনাৰ পাছত অৱশেষত নিয়ন্ত্ৰণ ৰেখাৰ সমীপৰ পৰা দেশ দুখনে সেনা অঁতৰাই নিয়াৰ সিদ্ধান্ত লয়।
ইয়াৰ মাজতে পুনৰ ব্ৰহ্মপুত্ৰৰ ওপৰত নদীবান্ধ নিৰ্মাণৰ বিষয়টোৱে দেশ দুখনৰ মাজত সম্পৰ্কৰ অৱনতি ঘটোৱাৰ সম্ভাৱনাই দেখা দিছে।
