পুনৰ শতকীয় ইনিংছেৰে উজলি উঠিল পৃথ্বী শ্ব। ইয়াকে লৈ চলিত বিজয় হাজাৰে ট্ৰফীত সাতখন মেচত পৃথ্বীয়ে চাৰিটাকৈ শতক অৰ্জন কৰিলে।
পৃথ্বীয়ে দিল্লীৰ বিৰুদ্ধে এই টুৰ্ণামেন্টৰ প্ৰথমখন মেচতে ১০৫ৰাণ কৰে। ইয়াৰ পাছত পুডুচেৰীৰ বিৰুদ্ধে অভিলেখ গঢ়ি ২২৭ৰাণৰ ৰাজকীয় ইনিংছ খেলে শ্বই।
সেইদৰে, সৌৰাষ্ট্ৰৰ বিৰুদ্ধে কোৱাৰ্টাৰ ফাইনেলত ১৮৫ৰাণৰ বিস্ফোৰক ইনিংছ খেলে। এইবাৰ ছেমিফাইনেলত কৰ্ণাটকৰ বিৰুদ্ধে ১২২টা বলত ১৬৫ৰাণৰ আন এক দুৰ্দান্ত ইনিংছ খেলে তৰুণ ক্ৰিকেটাৰগৰাকীয়ে।
পৃথ্বীৰ এই দমনীয় ইনিংছটোত তেওঁ ১৭টা চাৰি আৰু ৭টা ছয় কোবায়। তেওঁ ৪৮টা বলত অৰ্দ্ধশতক সম্পূৰ্ণ কৰে যদিও ইয়াৰ পাছত ৭৯টা বলতে শতৰাণ সম্পূৰ্ণ কৰে। আনহাতে, পৃথ্বীয়ে ১৫০ৰাণ সম্পূৰ্ণ কৰে মাত্ৰ মাত্ৰ ১১১টা বলত।
টুৰ্ণামেন্টখনত মুম্বাইৰ অধিনায়কগৰাকীয়ে ৭খন মেচত এতিয়ালৈকে ১৮৮.৫০ গড়ে ৭৫৪ৰাণ সংগ্ৰহ কৰিছে। এইদৰে তেওঁ বিজয় হাজাৰে ট্ৰফীত এটা ছিজনত আটাইতকৈ অধিক ৰাণ কৰাৰ অভিলেখ গঢ়ে পৃথ্বী শ্বই।
এইক্ষেত্ৰত পৃথ্বীয়ে মায়ংক আগৰৱালাৰ অভিলেখ ভংগ কৰিছে। ২০১৭-১৮ বৰ্ষত কৰ্ণাটকৰ হৈ মায়ংকে ৮খন মেচত ৭২৩ৰাণ কৰিছিল।
