ক্ষুদ্ৰ এটা কেমেৰা ভক্ষণ কৰিলেই কেমেৰাটোৱে শৰীৰৰ ভিতৰৰ পাকস্থলীৰ কেঞ্চাৰ ৰোগৰ প্ৰমাণসমূহ ধৰা পেলাব!
ইংলেণ্ডৰ চিকিৎসা বিভাগে এই সদ্ধান্ত গ্ৰহণ কৰিছে।
সংবাদ মাধ্যমত প্ৰকাশ পোৱা মতে, দেশখনৰ নেচনেল হেল্থ চাৰ্ভিছৰ ১১ হাজাৰজন কেঞ্চাৰ ৰোগীক এই কেমেৰাটো খাবলৈ দিয়া হ’ব।
এটা পিলতকৈও ক্ষুদ্ৰ এই কেমেৰাটোৱে শৰীৰৰ ভিতৰত প্ৰতি চেকেণ্ডত দুখনকৈ ফটো ৰেকৰ্ড কৰিব।
তাৰপাছত শৰীৰৰ ভিতৰত পোৱা ফটো তথা তথ্যসমূহ আন এটা ডিভাইচলৈ প্ৰেৰণ কৰিব।
উক্ত ডিভাইচটো ৰোগীজনৰ কঁকালত বন্ধা থাকিব।
দেশখনৰ ৪০টা চিকিৎসাকেন্দ্ৰত এই ব্যৱস্থা গ্ৰহণ কৰা হ’ব।
নেচনেল হেল্থ চাৰ্ভিছে কয় যে কেমেৰাটোক ‘কলন কেপচুল এণ্ডস্কপী’ অথবা ‘পিল কেম’ নামেৰে জনা যাব।
কেমেৰাটোৱে পাঁচৰ পৰা আঠ ঘণ্টাৰ ভিতৰত শৰীৰৰ ভিতৰৰ ছৱি প্ৰস্তুত কৰিব।
ৰোগীসকলে কেমেৰাটোৰ দ্বাৰা কোনোধৰণৰ শাৰিৰীক অসুবিধা লাভ নকৰে বুলিও লগতে আশ্বাস প্ৰদান কৰিছে।
উল্লেখযোগ্য, এই প্ৰযুক্তিটো ২০০১ চনৰ পৰা আমেৰিকা যুক্তৰাষ্ট্ৰত প্ৰয়োগ হৈ আহিছে।
স্কটলেণ্ডতো একেধৰণৰ এটা আঁচনি ২০২০ চনৰ নৱেম্বৰত মুকলি কৰা হৈছিল।
ইউনিভাৰ্চিটি কলেজ লণ্ডন হস্পিতালেও যোৱা বছৰ এই প্ৰযুক্তি ব্যৱহাৰ কৰিছিল।
নেচনেল হেল্থ চাৰ্ভিছে আশা কৰা মতে, কেমেৰাটোৱে পাকস্থলীৰ কেঞ্চাৰ সোনকালেই ধৰা পেলাই আৰোগ্যলাভৰ ক্ষেত্ৰত সহায়ক হ’ব।
উল্লেখযোগ্য যে ২০২০ চনৰ জানুৱাৰীৰ পৰা ক’ভিড-১৯ মহামাৰীৰ বাবে কেঞ্চাৰকে ধৰি দুৰাৰোগ্য ৰোগসমূহৰ চিকিৎসাৰ বাহিৰে আন ৰোগসমূহৰ ক্ষেত্ৰত দেশখনৰ চিকিৎসালয়সমূহ বন্ধ কৰা হৈছিল।
