বিজেপিৰ হৈ অসমলৈ নিৰ্বাচনী প্ৰচাৰ চলাবলৈ অহা উত্তৰ প্ৰদেশৰ মুখ্যমন্ত্ৰী যোগী আদিত্যনাথে মহাপুৰুষ শ্ৰীমন্ত শংকৰদেৱকলৈ কৰা এক বিশেষ মন্তব্যই এতিয়া ব্যাপক প্ৰতিক্ৰিয়াৰ সৃষ্টি কৰিছে।
মহাপুৰুষ শ্ৰীমন্ত শংকৰদেৱে অসমত অনুপ্ৰৱেশকাৰীৰ বিৰুদ্ধে যুদ্ধ কৰিছিল বুলি আদিত্যনাথে নিৰ্বাচনী ভাষণত মন্তব্য কৰা বুলি অভিযোগ কৰি কংগ্ৰেছে উত্তৰপ্ৰদেশৰ মুখ্যমন্ত্ৰী গৰাকীক উভতি ধৰিছে।
আদিত্যনাথৰ মন্তব্যক কঠোৰ ভাষাৰে সমালোচনা কৰি কংগ্ৰেছে কৈছে যে এনে মন্তব্যৰ জৰিয়তে আদিত্যনাথে অসম সম্পৰ্কত থকা তেওঁৰ জ্ঞানৰ দৈন্যতাকে উদঙাই দিছে।
কংগ্ৰেছৰ প্ৰচাৰ বিভাগৰ নেত্ৰী ববিতা শৰ্মাই প্ৰেৰণ কৰা এক বিবৃতিত আদিত্যনাথে জগতগুৰু শংকৰদেৱক কৰা অপমান সমগ্ৰ অসমবাসীক কৰা অপমান বুলি অভিহিত কৰিছে।
যি গৰাকী মহাপুৰুষে সমাজত বৈষম্য দূৰ কৰি জাতি-ভেদ প্রথাৰ বিৰুদ্ধে যুঁজিছিল , তেনে এগৰাকী ব্যক্তিয়ে অসমত অনুপ্ৰৱেশকাৰীৰ বিৰুদ্ধে যুঁজা বুলিকৈ আদিত্যনাথে মহাপুৰুষগৰাকীক অপমান কৰা বুলি কংগ্ৰেছে মন্তব্য কৰিছে।
উল্লেখ্য আজি উত্তৰ প্ৰদেশৰ মুখ্যমন্ত্ৰী যোগী আদিত্যনাথে ৰঙিয়া, কলাইগাঁও,হোজাই আদি স্থানত বিজেপিৰ প্ৰাৰ্থীৰ হৈ প্ৰচাৰ চলায়ে।
আদিত্যনাথৰ পূৰ্বে প্ৰধানমন্ত্ৰী নৰেন্দ্ৰ মোদীয়েও কিছুদিন পূৰ্বে বীৰ লাচিত বৰফুকনক ভাৰতৰ স্বাধীনতা আন্দোলনৰ সংগ্ৰামী যোদ্ধা আছিল বুলি মন্তব্য কৰিছিল।
আহমেদাবাদত আয়োজিত ‘আজাদী কি অমৃতচ মহোৎসৱ’ত প্ৰধানমন্ত্ৰী নৰেন্দ্ৰ মোদীয়ে লাচিত বৰফুকনক স্বাধীনতা সংগ্ৰামী বুলি কৈছিল।