অসমত কোভিড-১৯ৰ দ্বিতীয়টো ঢৌ বৃদ্ধি পোৱাৰ আশংকাৰ মাজতে ৰাজ্যখনত মাৰাত্মক ভাইৰাছটোৰ ফলত এগৰাকী ব্যক্তিৰ মৃত্যু ঘটিছে।
শিলচৰত এগৰাকী ৫০ বছৰীয়া ব্যক্তিৰ কোভিড-১৯ত মৃত্যু ঘটিছে।
কোভিডত মৃত্যু হোৱা ব্যক্তিগৰাকীক মনোহৰ গ’ড় বুলি চিনাক্ত কৰা হৈছে।
মনোহৰ গ’ড়ৰ দেওবাৰে শিলচৰ মেডিকেল কলেজ হাস্পাতল (এইচএমচি এইচ)ত কোভিড-১৯ৰ সৈতে যুঁজ দি শেষ নিশ্বাস ত্যাগ কৰে।
চলিত বছৰৰ জানুৱাৰি মাহৰ পাছত কাছাৰ জিলাত কোভিড-১৯ত মৃত্যুৰ এইটো প্ৰথম ঘটনা।
হাস্পাতল কৰ্তৃপক্ষই জানিবলৈ দিয়া মতে মৃত ব্যক্তিগৰাকীক যোৱা ১৭ মাৰ্চত যক্ষ্মাৰোগৰ চিকিৎসাৰ বাবে হাস্পাতলখনত ভৰ্তি কৰোৱা হৈছিল।
হাস্পাতলখনত ভৰ্তি কৰাৰ পাছত ৰেপিড-এন্টিজেন টেষ্টত মনোহৰ গ’ড়ৰ কোভিড-১৯ পজিটিভ ধৰা পৰিছিল।
মনোহৰ গ’ড় কাছাৰ জিলাৰ দয়াপুৰ গাঁৱৰ এগৰাকী বাসিন্দা আছিল।
শিলচৰ মেডিকেল কলেজ হাস্পাতলৰ অধ্যক্ষ ডাঃ বাবুল বেজবৰুৱাই ৰাজ্যখনত কোভিড-১৯ৰ দ্বিতীয় ঢৌ সম্পৰ্কে সতৰ্ক কৰি দিছে।
ডাঃ বেজবৰুৱাই কয়, ‘’দ্বিতীয় ঢৌৰ বাবে সজাগ হোৱাৰ এয়াই সঠিক সময়।‘’