দৰিদ্ৰ পৰিয়ালৰ বাবে আৱাস গৃহ প্ৰদান কৰা দেশৰ সৰ্ববৃহৎ আঁচনি প্ৰধানমন্ত্ৰী আৱাস যোজনাত সংঘটিত হৈছে প্ৰায় ২ হাজাৰ টকাৰ কেলেংকাৰি। এই অভিযোগ দেশৰ তদন্তকাৰী সংস্থা চিবিআইৰ।
বুধবাৰে তদন্তকাৰী সংস্থাটোৱে এই অভিযোগ তুলি এক গোচৰো ৰুজু কৰিছে।
চিবিআইৰ অভিযোগ অনুসৰি দেৱান হাউছিং ফাইনেন্স লিমিটেড(DHFL)ৰ প্ৰমোটৰ কপিল আৰু ধীৰজ ৱাধৱন ভাতৃদ্বয়ে এই দুৰ্নীতি সংঘটিত কৰিছে।
উল্লেখ্য যে এই দুই ভাতৃ অন্য এক গোচৰত বৰ্তমানেও কাৰাৰুদ্ধ হৈয়ে আছে।
প্ৰধামন্ত্ৰী আৱাস যোজনাৰ অধীনত নিম্ন আৰু মধ্যমীয়া উপাৰ্জনক্ষম পৰিয়ালসমূহক গৃহ ঋণ দিয়া হয় আৰু এই ঋণৰ সুদৰ ভৰতুকি দিয়ে চৰকাৰে। চৰকাৰে প্ৰদান কৰা এই ভৰতুকিৰ ধন পিএমৱাইৰ হিতাধিকাৰীয়ে ডিএছএফএলৰ সংস্থাৰ মাধ্যমেৰে লাভ কৰে।
চিবিআইৰ অভিযোগ মতে প্ৰতিষ্ঠানটোৱে হিতাধিকাৰীৰ নামত কেবাহাজাৰ ভুৱা একাউন্ট খুলি সেই চৰকাৰী ভৰতুকিৰ ধন আত্মস্যাৎ কৰি আহিছে।
২০১৫ চনত প্ৰধানমন্ত্ৰী আৱাস যোজনা আৰম্ভ হোৱাৰ পিছত অভিযোগ অনুসৰি ২০১৮ চনৰ জুনৰ পৰা এই বিনিয়োগকাৰী সংস্থাটোক ৮৮ হাজাৰ ৬৫১ টা ঋণৰ মঞ্জুৰি দিয়া হৈছিল। ইয়াৰ মাধ্যমেৰে ১৮ হাজাৰ কোটি টকা ঋণ প্ৰদান কৰা হৈছিল।
এই ঋণৰ সুদৰ ভৰতুকিৰ বাবদ প্ৰতিষ্ঠানটোৱে চৰকাৰক ১ হাজাৰ ৮৮০ কোটি টকাৰ দাবী কৰে আৰু ইয়াৰে ৫৩৯ কোটি ৪০ লাখ টকা মুকাই দিয়াৰ বিপৰীতে ১ হাজাৰ ৩৪৭ কোটি ৮০ লাখ টকা বকেয়া হৈ আছে।
ফৰেন্সিক এডিটৰ তদন্তত দেখা যায় যে কপিল আৰু ধীৰজে প্ৰায় ২ লাখ ৬০ হাজাৰ গৃহ ঋণ একাউন্ট খুলি চৰকাৰৰ পৰা প্ৰধানমন্ত্ৰী আৱাস যোজনাৰ ঋণ লয়। বান্দ্ৰা চিএইএফএল শাখাত খোলা এই এখাউন্টসমূহৰ কোনো অস্তিত্বই নাই বুলি নিশ্চিত কৰিছে তদন্তকাৰী সংস্থাটোৱে।
উল্লেখ্য যে বিগত বৰ্ষৰ জুন মাহত চিবিআই-এ এই দুই ভাতৃ আৰু ইয়েছ বেংকৰ প্ৰতিষ্ঠাতা ৰাণা কাপুৰৰ বিৰুদ্ধে চাৰ্জশ্বিট দাখিল কৰিছিল। ইয়েছ বেংকৰ প্ৰতিষ্ঠাতা ৰাণা কাপুৰৰ পৰাও দুই ভাতৃয়ে পঢৌকন লাভ কৰা বুলি অভিযোগ উত্থাপন হৈছিল।
ইফালে তদন্তকাৰী সংস্থাৰ দাবী যে ইয়েছ বেংকে ডিএছএফএলত সাধাৰণ লোকৰ একাউন্টৰ ৩ হাজাৰ ৭০০ কোটি টকা বিনিয়োগ কৰিছিল। ইয়াৰ বাবদ ডিএছএফএলক ৰাণা কাপুৰে ৬০০ কোটি টকা উপঢৌকন দিছিল।
অভিযোগ অনুসৰি ৰাণা কাপুৰৰ পত্নী আৰু কন্যাৰ এটা সংস্থাটো ধন ডিএছএফএ-এ বিনিয়োগ কৰিছিল। এই অভিযোগৰ ভিত্তিতে যোৱা এপ্ৰিলত ৱাধৱন দুই ভাতৃক গ্ৰেপ্তাৰ হৈছিল।
ইয়াৰ এক মাহৰ পূৰ্বে মাৰ্চ মাহত গ্ৰেপ্তাৰ কৰা হৈছিল ইয়েছ বেংকৰ প্ৰতিষ্ঠাতা ৰাণা কাপুৰক।
এই দুৰ্নীতিৰ সৈতে এইবাৰ প্রধানমন্ত্ৰী আৱাস যোজনাতো দুৰ্নীতি সংঘটিত হোৱাৰ অভিযোগ উত্থাপন কৰিছে চিবিআই-এ।
