ভাৰতৰ প্ৰধানমন্ত্ৰী নৰেন্দ্ৰ মোডীৰ বাংলাদেশ ভ্ৰমণক লৈ দেশখন প্ৰতিবাদে চূড়ান্ত ৰূপ ধাৰণ কৰিছে।
বাতৰি অনুযায়ী কমেও পাঁচজন প্ৰতিবাদী আৰক্ষীৰ গুলিত নিহত হৈছে।
আনহাতে কেইবাজনো প্ৰতিবাদী গুৰুত্তৰভাৱে আঘাতপ্ৰাপ্ত হৈছে।
মূলতঃ দেশখনৰ পূব প্ৰান্তৰত সংঘটিত এই প্ৰতিবাদত আৰক্ষীয়ে প্ৰতিবাদকাৰীসকলক দমন কাৰ্য অব্যাহত ৰাখিছে।
ব্ৰাহ্মণবৰীয়া জিলাত শ শ ছাত্ৰই শনিবাৰে আৰক্ষী আৰু সীমান্তসুৰক্ষা বাহিনীৰ স’তে হতাহতিত লিপ্ত হয়।
আৰক্ষীয়ে জনোৱামতে, হিংসাত্মক পৰিস্থিতি শাম কাটিবৰ বাবে তেওঁলোকে গোলাবৰ্ষণ কৰিবলগা হৈছে।
আৰক্ষীৰ গুলিত নিহত হোৱা লোককেইজনৰ নামসমূহ স্থানীয় আৰক্ষীয়ে সংবাদ মাধ্যমৰ মুকলি কৰা নাই।
আনহাতে বাংলাদেশী আৰক্ষী বিভাগে প্ৰতিবাদীসকলৰ মৃত্যুক লৈ এতিয়ালৈকে একো কোৱা নাই।
শুকুৰবাৰে ৰাজধানী ঢাকাত আৰম্ভ হোৱা হিংসাত্মক প্ৰতিবাদে লগে লগে কেইবাখনো জিলালৈ বিয়পি পৰে।
প্ৰতিবাদীসকলে ভাৰতৰ প্ৰধানমন্ত্ৰী মোদীৰ বিৰুদ্ধে হিন্দু সংখ্যাগৰিষ্ঠ ভাৰতত সংখ্যালঘু মুছলিমসকলক অত্যাচাৰ কৰা হৈছে বুলি অভিযোগ কৰিছে।
শুকুৰবাৰে ‘হেফাজত-ই-ইছলাম’ নামৰ সংগঠনটোৰ চাৰিজনকৈ প্ৰতিবাদকাৰী আৰক্ষীৰ গুলিত নিহত হয়।
অভিযোগ অনুসৰি প্ৰতিবাদীসকলে চিটাগং চহৰৰ এখন আৰক্ষী থানা আক্ৰমণ কৰিবৈল গৈছিল।
শুকুৰবাৰেও চহৰখনত উক্ত সংগঠনটোৰ প্ৰতিবাদ অব্যাহত ৰাখিছে।
সংগঠনটোৱে দেওবাৰে দেশজুৰি ধৰ্মঘটৰ আহ্বান জনাইছে।
আনহাতে, মানৱ অধিকাৰ সংস্থা ‘এমনেষ্টী ইণ্টাৰনেচনেল’-য়েও চিটাগঙত আৰক্ষীয়ে লোৱা ব্যৱস্থাক সমালোচনা কৰিছে।
উল্লেখযোগ্য যে প্ৰধানমন্ত্ৰী মোদীয়ে ঢাকাত শুকুৰবাৰে ভৰি থৈছিল।
কৰোণা ভাইৰাছ মহামাৰীৰ পাছত তেওঁৰ এইটো প্ৰথম আন্তঃৰাষ্ট্ৰীয় ভ্ৰমণ।
বাংলাদেশৰ ৫০তম স্বাধিনতা বাৰ্ষিকী উপলক্ষে মোদীয়ে বাংলাদেশ ভ্ৰমণ কৰিছে।
মোদীৰ ভ্ৰমণ উপলক্ষে হোৱা প্ৰতিবাদলৈ লক্ষ্য কৰি বাংলাদেশ চৰকাৰে ইণ্টাৰনেটো বন্ধ ৰাখিছিল।
