ক’ৰ’ণাই সংহাৰী ৰূপ ধাৰণ কৰিছে ভাৰতত।
প্ৰতিদিনে প্ৰায় ৯০ হাজাৰকৈ লোক ক’ৰ’ণাত আক্ৰান্ত হৈছে। দেশত এতিয়া তৃতীয় পৰ্যায়ৰ ভেকচিন প্ৰদানৰ কাম আৰম্ভ হৈছে।
প্ৰথম পৰ্যায়ৰ ভেকচিন প্ৰদান কাৰ্যসূচীত চৰকাৰে স্বাস্থ্য কৰ্মীসকলৰ লগতে কোভিড যোদ্ধাসকলক ভেকচিন দিয়াৰ পদক্ষেপ হাতত লৈছিল।
ইয়াৰ বাবে স্বাস্থ্য কৰ্মীসকলক নাম পঞ্জীয়ন কৰিবলৈ কোৱা হৈছিল যদিও বহু স্বাস্থ্য কৰ্মীয়ে ভেকচিন লোৱাৰ ক্ষেত্ৰত অনীহা প্ৰদৰ্শন কৰিছিল।
এই কথাতে ক্ষুদ্ধ হৈ পৰিছে চৰকাৰ। কেন্দ্ৰীয় চৰকাৰে শেহতীয়াকৈ এইবুলি ঘোষণা কৰিছে যে যিসকল স্বাস্থ্য কৰ্মীয়ে ক’ৰ’ণাৰ ভেকচিন লোৱাৰ বাবে ইতিমধ্যে নাম পঞ্জীয়ন কৰা নাই তেওঁলোকক নতুনকৈ আৰু নাম পঞ্জীয়ন কৰিবলৈ দিয়া নহ’ব।
চৰকাৰে আৰু নাম পঞ্জীয়ন নকৰা সবাস্থ্য কৰ্মীসকলকলৈ সময় নষ্ট কৰিব নিবিচাৰে বুলি স্পষ্ট কৰি দিছে। উল্লেখ্য সমগ্ৰ দেশতে এতিয়ালৈকে ৮৯ লাখ স্বাস্থ্য কৰ্মীয়ে ক’ৰ’ণাৰ ভেকচিন গ্ৰহণ কৰিছে।
এতিয়াও বহু স্বাস্থ্য কৰ্মীয়ে ভেকচিন ল’বলৈ বাকী আছে।
দেশত যোৱা ২৪ ঘন্টাত ৯৩হাজাৰ লোক লোক কৰ’নাত আক্ৰান্ত হৈছে। ইয়াৰ বিতৰত অধিক সংখ্যক আক্ৰান্ত হৈছে মহাৰাষ্ট্ৰত। কালিয়েই আক্ৰান্তৰ সংখ্যা আছিল প্ৰায় ৫০হাজাৰ।
মহাৰাষ্ট্ৰৰ উপৰি দিল্লী , পঞ্জাৱ, হাৰিয়ানা, কৰ্ণাটক, কেৰেলা, ছত্তীশগড়, গুজৰাট, মধ্যপ্ৰদেশৰ দৰে ৰাজ্যসমূহতো কৰ’নাৰ সংক্ৰমণ দ্ৰুত গতিত বৃদ্ধি পাইছে।
কেন্দ্ৰীয় স্বাস্থ্য মন্ত্ৰ্যালয়ে দিয়া তথ্য অনুসৰি বিগত ২৪ ঘন্টাত দেশত মুঠ আক্ৰান্তৰ সংখ্যা হৈছে ৯৩হাজাৰ ২৪৯জন। ইয়াৰ ফলত বৰ্তমানলৈকে দেশত মুঠ আক্ৰান্তৰ সংখ্যা ১কোটি ২৪ লাখ ৮৫হাজাৰ ৫০৯জনলৈ বৃদ্ধি পালে।
আনহাতে, বিগত ২৪ ঘন্টাত দেশত কৰ’নাত আক্ৰান্ত হৈ ৫১৩জন লোকৰ মৃত্যু হৈছে। ই যোৱা বছৰৰ ডিচেম্বৰ মাহৰ অভিলেখো ভংগ কৰিছে।
কেন্দ্ৰীয় স্বাস্থ্য মন্ত্ৰ্যালয়ে দিয়া তথ্য অনুসৰি বিগত ২৪ ঘন্টাত দেশত মুঠ ৬০হাজাৰ ৪৮জন লোক কৰ’নাৰ পৰা আৰোগ্য লাভ কৰিছে। এয়া দৈনিক আক্ৰান্তৰ সংখ্যাতকৈ বহু কম।
বৰ্তমান দেশত মুঠ সক্ৰিয় কৰ’না ৰোগীৰ সংখ্যা হৈছে ৬লাখ ৯১হাজাৰ ৫৯৭জন। সেইদৰে এতিয়ালৈকে দেশত কৰ’নাৰ পৰা আৰোগ্য লাভ কৰা লোকৰ মুঠ হৈছে ১ কোটি ১৬লাখ ২৯ হাজাৰ ২৮৯জন।
উল্লেখ্য যে যোৱা ১৬ জানুৱাৰিৰ পৰা দেশত কৰ’নাৰ টীকাকৰণ আৰম্ভ হৈছে। এতিয়ালৈকে দেশৰ ৭কোটি ৫৯লাখ ৭৯হাজাৰ ৬৫১জন লোকৰ টীকাকৰণ হৈছে।
