চিকিৎসালয়ত জুই লগাৰ পাছতো নিজৰ কৰ্তব্যৰ সফল সমাপন কৰি বাতৰিৰ শিৰোনামালৈ আহিছে ৰাছিয়াৰ কেইজনমান চিকিৎসক আৰু নাৰ্ছ।
বাতৰি অনুযায়ী ৰাছিয়াৰ ব্লাগ’ৱেশ্বচ্ছেনস্ক নামৰ ঠাইখনৰ চিকিৎসালয়খনত জুই লাগে।
জুই লগাৰ সময়ত চিকিৎসালয়খনৰ অস্ত্ৰোপচাৰ কক্ষত চিকিৎসকসকলে এটা হাৰ্ট চাৰ্জাৰী চলাই আছিল।
কিন্তু জুইৰ শিখাই চিকিৎসালয়খন ছানি ধৰাৰ পাছতো চিকিৎসক আৰু নাৰ্ছসকল নিজৰ কৰ্তব্য আধাতে এৰি নিদি পূৰ্ণগতিত অস্ত্ৰোপচাৰটো চলাই থাকিল।
সামাজিক মাধ্যমত ঘটনাটোৰ ভিডিঅ’টো বৰ্তমান ভাইৰেল হৈ পৰিছে।
বহুতো লোকে চিকিৎসকলে নিজৰ জীৱনৰ ভয়কো নেওচি নিষ্ঠা আৰু কৰ্তব্যপৰায়ণতাত ৰত থকাৰ বাবে বাবে ভূয়সী প্ৰশংসা কৰিছে।
ৰাছিয়াৰ চৰকাৰী মন্ত্ৰালয়ৰ মতে, চিকিৎসালয়খনৰ জুই নুমুৱাবৰ বাবে ৫৯জন অগ্নিনিৰ্বাপক কৰ্মী নিয়োগ কৰিব লগা হৈছিল।
অৱশ্যে অগ্নিকাণ্ডটোত কোনো লোক হতা-হত হোৱা নাই।
বৈদ্যুতিক বিজুতিৰ বাবে সংঘটিত অগ্নিকাণ্ডটো নিৰ্বাপন কৰিবলৈ কেইবাঘণ্টা লাগে।
অগ্নিকাণ্ডৰ ফলত চিকিৎসালয়খনৰ পৰা ১২০ জন লোকক স্থানান্তৰ কৰা হয়, ইয়াৰে ৬৭জন ৰোগী।
অগ্নিকাণ্ডটো সংঘটিত হওঁতে যিজন ৰোগীৰ চাৰ্জাৰী চলি আছিল হৃদৰোগত আক্ৰান্ত আছিল।
চিকিৎসালয়ৰ প্ৰথম মহলাৰ অস্ত্ৰোপচাৰ কক্ষত ৮জন চিকিৎসকে তেওঁৰ চাৰ্জাৰী সম্পাদন কৰি আছিল।
কিন্তু সেইসময়তে জুইয়ে চাৰিওফালে ছানি ধৰাৰ পাছতো চিকিৎসকসকলে নিজৰ কৰ্তব্যত গাফিলতী নকৰিলে।
চিকিৎসকলক নেতৃত্ব দিয়া ভালেণ্টিন ফিলাটভে কয় যে সেইসময়ত ক’লৈকো যাব পৰা হোৱা নাছিল কাৰণ ৰোগীজনক বচাব লাগে।
অস্ত্ৰোপচাৰ কক্ষৰ ভিতৰত জুই নালাগিবলৈ চিকিৎসালয় কৰ্তৃপক্ষই যথোপযুক্ত ব্যৱস্থা লয়।
চিকিৎসকসকলে প্ৰকাশ কৰামতে, তেওঁলোকে কৰ্তব্যৰ মাজতে ভাবিছিল যে প্ৰায় এশ বছৰ পুৰণি চিকিৎসালয়খনৰ বিল্ডিংৰ মুধচখনে জুইক প্ৰতিহত কৰিব পাৰিবনে!
যি কি নহওক, জুই লাগি থকা অৱস্থাতে তেওঁলোকে সফলভাৱে চাৰ্জাৰীটো সম্পাদন কৰে আৰু ৰোগীজনক এখন স্থানীয় চিকিৎসালয়লৈ প্ৰেৰণ কৰে।
চিকিৎসালয়খন ৰাছিয়াৰ আমুৰ নামৰ ৰাজ্যখনত অৱস্থিত।
সংবাদমাধ্যমত প্ৰকাশ পোৱামতে, ৰাজ্যখনৰ গভৰ্ণৰ ভাছিলী অৰ্লভে চিকিৎসককেইজনলৈ পুৰস্কাৰ প্ৰদানৰ ঘোষণা কৰিছে।
