সোমবাৰৰ পৰা বাংলাদেশত দেশজুৰি লকডাউন ঘোষণা কৰা হৈছে।
এই লৈ দেশখন উত্তাল হৈ পৰিছে।
দেশখনৰ গ্ৰাম্যাঞ্চলত লকডাউন আৰু আৰক্ষী বলবৎ কৰাৰ বিৰুদ্ধে হিংসাত্মক প্ৰতিবাদ সংঘটিত হৈছে।
প্ৰতিবাদকাৰীসকলে এখন আৰক্ষী থানাও আক্ৰমণ কৰে।
আৰক্ষীয়ে গুলিচালনা কৰে আৰু গুলিচালনাত তিনিজন লোক আঘাতপ্ৰাপ্ত হয়।
আৰক্ষী আৰু চিকিৎসকসকলে এই কথা প্ৰকাশ কৰিছে।
শেহতীয়াকৈ খবৰ আহিছে যে আঘাতপ্ৰাপ্ত লোককেইজনৰ এজনৰ মৃত্যু হৈছে।
ঘটনাটো সংঘটিত হয় সোমবাৰে বিয়লি বেলাত।
আৰক্ষীয়ে প্ৰকাশ কৰামতে, ফৰিদপুৰ জিলাৰ চালথা নামৰ চহৰখনত এটা উৰাবাতৰি উলায় যে এখন বজাৰত এজন লোক কৰ্তব্যৰত আৰক্ষীৰ লাঠিচালনাত আঘাতপ্ৰাপ্ত হৈছে।
তাৰপাছতে হাজাৰ হাজাৰ গাওঁবাসীয়ে ক্ষোভত ফাটি পৰে আৰু ৰাস্তাত প্ৰতিবাদ সাব্যষ্ট কৰে।
প্ৰতিবাদীকাৰীসকলৰ কিছুসংখ্যকে এটা আৰক্ষী থানালৈ ইটাৰ টুকুৰা দলিয়ায় আৰু চহৰখনৰ চৰকাৰী কাৰ্যালয়সমূহত আক্ৰমণ কৰে।
আৰক্ষীয়ে কয় যে তদুপৰি দুখনকৈ বিভাগীয় চৰকাৰী গাড়ী আৰু এজন চৰকাৰী বিষয়াৰ ঘৰো তেওঁলোকৰ আক্ৰমণৰ লক্ষ্য কৰি লয়।
আৰক্ষীয়ে কয় যে আৰক্ষী থানাত আক্ৰমণ সংঘটিত হোৱাৰ পাছতে আৰক্ষীয়ে নিজৰ নিৰাপত্তাৰ বাবে গুলিচালনা কৰে।
গুলিচালনাত হতাহত হোৱা লোকসকলৰ তালিকা আৰক্ষীয়ে ৰাজহুৱা কৰা নাই যদিও স্থানীয় চিকিৎসা মহাবিদ্যালয়ৰ এজন চিকিৎসকে কোৱামতে, ৩জন লোক গুৰুত্তৰভাৱে আঘাতপ্ৰাপ্ত হৈছে।
ইয়াৰে এজনৰ ইতিমধ্যে মৃত্যু হৈছে।
দুজন আৰক্ষী বিষয়াই কোৱামতে, আক্ৰমণৰ স’তে ইছলামিক সংগঠন হেফাজত-ই-ইছলামো জড়িত আছে।
অৱশ্যে সংগঠনটোৱে এইপৰ্যন্ত কোনো প্ৰতিক্ৰিয়া প্ৰকাশ কৰা নাই।
উল্লেখযোগ্য যে দেশখনৰ কৰোণাভাইৰাচ কেচসমূহে অভিলেখ স্পৰ্শ কৰাৰ বাবে সোমবাৰৰ পৰা দেশজুৰি লকডাউন বলবৎ কৰা হৈছিল।
লকডাউনৰ বিৰুদ্ধে ৰাজধানী ঢাকাতো ব্যৱসায়ীসকলে প্ৰতিবাদ সাব্যষ্ট কৰিছে।
