নদীৰ মাজতে চলন্ত অৱস্থাত থকা এখন ফেৰী দাউ দাউকৈ জ্বলি উঠিল।
অৱশ্যে সৌভাগ্যক্ৰমে এই ঘটনাত কোনো লোকৰ মৃত্যু ঘটাৰ বাতৰি পোৱা হোৱা নাই।
ফেৰী খনত জুই লগাৰ ফলত ফেৰী খনত কঢ়িয়ীই অনা ১০ খন বাহন সম্পূৰ্ণ ৰূপে জ্বলি ভষ্মীভূত হয়।
এই ভয়ংকৰ ঘটনাটো ঘটিছে বাংলাদেশত। বাংলাদেশৰ মেঘনা নৈত দেশ খনৰ ৰাজধানী চহৰ ঢাকাৰ পৰা প্ৰায় ২০০ কিলোমিটাৰ নিলগত সংঘটিত হৈছে এই ঘটনাটো।
দেশখনৰ দক্ষিণ অঞ্চলৰ ভোলা জিলাৰ পৰা লক্ষীপুৰ জিলালৈ যাত্ৰা কৰাৰ সময়তে এই অঘটনটো ঘটে।
ভোলা জিলাৰ ইলিশা ফেৰী ঘাটৰ ভাৰপ্ৰাপ্ত বিষয়াগৰাকীৰ লগতে স্থানীয় প্ৰত্যক্ষদৰ্শীয়ে প্ৰকাশ কৰা মতে বুধবাৰে পুৱতি নিশা প্ৰায় ৩ বজাত ফেৰী খনত জুই লাগে।
‘কলমিলতা’ নামৰ ফেৰী খনত ১৫ খন গাড়ী আছিল বুলি জানিব পৰা গৈছে।
ফেৰী খনে কঢ়িয়াই নিয়া এখন মালবাহী ট্ৰাকত জুই লগাৰ পিছতে জুই ফেৰী খনৰ আন প্ৰান্তলৈ বিয়পি পৰে।
লগে লগে অগ্নিনিৰ্বাপক বাহিনীক খবৰ দিয়া হয় আৰু ‘কিষাণী’ নামৰ আন এখন ফেৰীৰে অগ্নিনিৰ্বাপক বাহিনীৰ কৰ্মীয়ে উক্ত স্থানলৈ গৈ জুই নিৰ্বাপন কৰিবলৈ সক্ষম হয়।ফলত জীৱন ৰক্ষা পৰে ফেৰী খনত থকা যাত্ৰীসকলৰ।
