মানস ৰাষ্ট্ৰীয় উদ্যানত আজি গঁড়ৰ আক্ৰমণত নিহত হয় এগৰাকী বনকৰ্মী।
শুকুৰবাৰে পুৱাৰ ভাগত বন পালক অনিমেষ ডেকাই উদ্যান খনৰ ভূঞাপাৰা ৰেঞ্জৰ ভিতৰত পহৰাৰত অৱস্থাত থকাৰ সময়তে এটা গঁড়ে আহি তেওঁক আক্ৰমণ কৰে।
এই ঘটনাত গুৰুতৰ ভাবে আহত হোৱা বন পালক ডেকাৰ থিতাতে মৃত্যু ঘটে বুলি ৰাষ্ট্ৰীয় উদ্যান খনৰ এগৰাকী বিষয়াই প্ৰকাশ কৰিছে।
৩৪ বছৰীয়া অনিমেষ ডেকাৰ ঘৰ বাগছা জিলাৰ ভৱানীপুৰৰ ডেকাপাৰাত আছিল।পৰিতাপৰ কথাটো এয়াই যে নিহত ডেকাই মাত্ৰ তিনি মাহ পূৰ্বে বিবাহপাশত আৱদ্ধ হৈছিল।
বনকৰ্মী গৰাকীৰ মৃত্যুৰ বাতৰি বিয়পি পৰাৰ লগে লগে ডেকাৰ ভৱানীপুৰত থকা বাসভৱনত এক বুজাব নোৱাৰা শোকাকুল পৰিবেশৰ সৃষ্টি হয়।
বনকৰ্মীগৰাকীৰ মৃত্যুত ভৱানীপুৰৰ লগতে ৰাষ্ট্ৰীয় উদ্যান খনত কৰ্মৰত আন বনকৰ্মী-বিষয়াৰ মাজত শোকৰ ছাঁ পেলাইছে।
উল্লেখ্য কোভিডৰ সংক্ৰমণৰ পৰিপ্ৰেক্ষিতত দীৰ্ঘদিন ধৰি বন্ধ হৈ থকা মানস ৰাষ্ট্ৰীয় উদ্যান আৰু ব্যাঘ্ৰ প্ৰকল্প বিগত বৰ্ষৰ অক্টোৱৰ মাহত পৰ্যটকৰ বাবে পুনৰ মুকলি কৰি দিয়া হৈছিল।
