আজিৰে পৰা তামুলপুৰ উচ্চতৰ মাধ্যমিক বিদ্যালয়ত আৰম্ভ হ’ব বড়ো সাহিত্য সভাৰ ৬০ সংখ্যক বাৰ্ষিক অধিৱেশন।
১০ আৰু ১১ এপ্ৰিলত দুদিনীয়া বৰ্ণাঢ্য কাৰ্যসূচীৰে অনুষ্ঠিত হ’বলগীয়া বড়ো সাহিত্য সভাৰ অধিৱেশনৰ প্ৰস্তুতি সম্পূৰ্ণ হৈ উঠিছে।
১০ এপ্ৰিলৰ পুৱা ৮-০০ বজাত মুখ্যদ্বাৰ মুকলি কৰিব তামুলপুৰৰ প্ৰাক্তন বিধায়ক ইমানুৱেল মোছাহাৰীয়ে।
দিনৰ ১-০০ বজাত প্ৰতিনিধিৰ নাম পঞ্জীয়ন কৰা হ’ব। সন্ধিয়া ৫-০০ বজাত সাহিত্য অকাডেমী পুৰস্কাৰ বিজয়ী তথা কোকৰাঝাৰ মহাবিদ্যালয়ৰ সহযোগী অধ্যাপক গোবিন্দ বড়োই প্ৰতিনিধি সভা উদ্বোধন কৰিব।
প্ৰতিনিধি সভা সঞ্চালনা কৰিব বড়ো সাহিত্য সভাৰ সভাপতি তৰেণ বড়োৱে।
১১ এপ্ৰিলৰ পুৱা ৭:৩০ বজাত পতাকা উত্তোলন কৰিব বড়ো সাহিত্য সভাৰ সভাপতি তৰেণ বড়োৱে।
৮-০০ বজাত শ্বহীদ তৰ্পণ ৰ পাছতে ৮-৩০ বজাত বড়ো সাহিত্য সভাৰ পৰা আঁতৰি যোৱা মনীষী সকললৈ শ্ৰদ্ধাঞ্জলি জনোৱা হ’ব।
সেইদৰে, ৯-০০ বজাত পুৰস্কাৰ প্ৰদান অনুষ্ঠান আৰু সম্বৰ্ধনা সভা অনুষ্ঠিত হ’ব। তামুলপুৰৰ বিশিষ্ট সমাজ কৰ্মী লেহোৰাম বড়োই উদ্বোধন কৰিবলগীয়া সভাখন সঞ্চালনা কৰিব বড়ো সাহিত্য সভাৰ উপ-সভাপতি ৰমেলা ইছলাৰীয়ে।
এই সভাতে উচ্চ মাধ্যমিক আৰু উচ্চতৰ মাধ্যমিক শিক্ষান্ত পৰীক্ষাত বড়ো মাতৃভাষা বিষয়ত অসমৰ ভিতৰতে সৰ্বোচ্চ নম্বৰ লাভ কৰা দুজনীকৈ ছাত্ৰীক সম্বৰ্ধনা জনোৱা হব।
সভাত সাহিত্য অকাডেমী বঁটা প্ৰাপক কেইবাগৰাকীও সাহিত্যিকৰ লগতে স্থানীয় সমাজকৰ্মী আৰু সাহিত্যিককো সম্বৰ্ধনা জনোৱা হ’ব।
দুপৰীয়া ১১-৩০ বজাত বড়ো সাহিত্য সভাৰ সভাপতি তৰেণ বড়োৰ সভাপতিত্বত অনুষ্ঠিত হ’ব মুকলি অধিৱেশন। মুকলি সভা উদ্বোধন কৰিব বিটিআৰৰ মুখ্য কাৰ্যবাহী সদস্য প্ৰমোদ বড়োই।
মুকলি সভাত মুখ্য অতিথি হিচাপে অংশ গ্ৰহণ কৰিব পদ্মশ্ৰী বঁটা প্ৰাপক ডঃ মঙ্গল সিং হাজোৱাৰীয়ে। বিশিষ্ট অতিথি হিচাপে অসম সাহিত্য সভাৰ সভাপতি ডঃ কুলধৰ শইকীয়া, প্ৰাক্তন বিটিচি প্ৰধান হাগ্ৰামা মহিলাৰী, ৰাজ্যসভাৰ সাংসদ বিশ্বজিৎ দৈমাৰী। নিৰ্দিষ্ট বক্তা হিচাপে কটন বিশ্ববিদ্যালয়ৰ অধ্যাপক ফুকন চন্দ্ৰ বড়োই অংশগ্ৰহণ কৰিব।
অভ্যৰ্থনা সমিতিয়ে মুকলি অধিৱেশনত সকলো ৰাইজৰ উপস্থিতি আন্তৰিকতাৰে কামনা কৰিছে।
