দেশত এতিয়া ক’ৰ’ণাৰ মহা সংহাৰ চলিছে। দেশৰ ১১ খন ৰাজ্যত ক’ৰ’ণাই নিতৌ হাজাৰ হাজাৰ লোকক আক্ৰান্ত কৰিছে।
এনে সময়তে মে’ মাহত অনুষ্ঠিত হ’বলগীয়া CBSE ৰ দশম আৰু দ্বাদশ শ্ৰেণীৰ পৰীক্ষাৰ ক্ষেত্ৰত কেন্দ্ৰীয় চৰকাৰে আজি দুটা বৃহৎ সিদ্ধান্ত গ্ৰহণ কৰে।
সেই মৰ্মে CBSE ৰ দশম শ্ৰেণীৰ পৰীক্ষা ক’ৰ’ণাতংকৰ বাবে বাতিল কৰা হৈছে আৰু দ্বাদশ শ্ৰেণাৰ পৰীক্ষা অনিৰ্দিষ্ট কাললৈ স্থগিত ৰখাৰ সিদ্ধান্ত লোৱা হৈছে।
বুধবাৰে প্ৰধানমন্ত্ৰী নৰেন্দ্ৰ মোদীৰ নেতৃত্বত অনুষ্ঠিত বিশেষ বৈঠকত এই সিদ্ধান্ত গ্ৰহণ কৰা হয়।
বৈঠকত গ্ৰহণ কৰা সিদ্ধান্ত অনুসৰি CBSE য়ে প্ৰস্তুত কৰা অৱজেক্টটিভ ক্ৰাইটেৰিয়াৰ ওপৰত ভিত্তি কৰি দশম শ্ৰেণীৰ ফলাফল ঘোষণা কৰা হ’ব।
যিসকল শিক্ষাৰ্থীয়ে সেই ফলাফলত সন্তুষ্ট নহ’ব তেওঁলোকে পৰৱৰ্তী সময়ত অনুষ্ঠিত কৰা বিশেষ পৰীক্ষাত বহিব পাৰিব।
একেদৰে দেশৰ ক’ৰ’ণা পৰিস্থিতিৰ ওপৰত ভিত্তি কৰি দ্বাদশ শ্ৰেণীৰ পৰীক্ষা অনুষ্ঠিত কৰাৰ সময় পুনৰ নিৰ্দ্ধাৰণ কৰা হ’ব আৰু আপাততঃ দ্বাদশ শ্ৰেণীৰ পৰীক্ষা স্থগিত ৰখাৰ সিদ্ধান্ত লোৱা হৈছে।
উল্লেখ্য অহা ৪ মে’ৰ পৰা CBSE ৰ দশম আৰু দ্বাদশ শ্ৰেণীৰ পৰীক্ষা অনুষ্ঠিত হোৱাৰ কথা আছিল।
ক’ৰ’ণাৰ সংহাৰৰ মাজতে পৰীক্ষা অনুষ্ঠিত কৰাৰ বিৰোধিতা কৰি দেশৰ ১ লাখ ছাত্ৰ-ছাত্ৰীয়ে চলিত বৰ্ষৰ মে’ মাহত অনুষ্ঠিত হ’বলগীয়া দশম আৰু দ্বাদশ শ্ৰেণীৰ পৰীক্ষা বাতিল কৰিবলৈ দাবী জনাই এখন পত্ৰত স্বাক্ষৰ কৰিছিল।
এই সকল ছাত্ৰ-ছাত্ৰীয়ে হয় দশম আৰু দ্বাদশ শ্ৰেণীৰ পৰীক্ষা বাতিল কৰিব লাগে অথবা অনলাইনৰ জৰিয়তে পৰীক্ষা অনুষ্ঠিত কৰিব লাগে বুলি দাবী জনাইছিল।
শেহতীয়াকৈ টুইটাৰত “cancelboardexams2021” হেছটেগ ব্যৱহাৰ কৰি ছাত্ৰ-ছাত্ৰীসকলে পৰীক্ষা বাতিলৰ বাবে জনমত গঠন কৰাৰ চেষ্টা চলাইছিল।
এনে জাগৰণৰ প্ৰতি দেশৰ কেইবা লাখ ছাত্ৰ-ছাত্ৰীয়ে সঁহাৰি জনোৱা পৰিলক্ষিত হৈছিল।
আনকি কংগ্ৰেছ নেত্ৰী প্ৰিয়ংকা গান্ধীয়েও ক’ৰ’ণাতংকৰ সময়ত পৰীক্ষা অনুষ্ঠিত কৰাটো ছাত্ৰ-ছাত্ৰীৰ জীৱনকলৈ হেতালি খেলাৰ লেখিয়া কথা হ’ব বুলি মন্তব্য কৰি পৰীক্ষা বাতিল কৰাৰ আহ্বান জনাইছিল।