এটা অচিনাক্ত দুৰ্বৃত্তৰ দলে বাছখনলৈ বিভিন্ন সামগ্ৰী নিক্ষেপ কৰে।
আনকি বাছখনৰ এখন খিৰিকীও ভাঙি পৰে।
যাৰ ফলত কথমপি ৰক্ষা পৰে তাৰকাসকল।
আৰক্ষীয়ে ইতিমধ্যে ৪০০ জন লোকক এই ঘটনা সম্পৰ্কত আটক কৰিছে।
ইংলেণ্ডৰ লিভাৰপুলত সংঘটিত হৈছে এই ঘটনা।
ইউৰোপৰ ফুটবল ক্লাবসমূহৰ যুদ্ধক্ষেত্ৰস্বৰূপ উৱেফা চেম্পিয়নছ লীগৰ এখন কোৱাৰ্টাৰ ফাইনেলৰ আগমূহূৰ্তত ঘটা এই কাণ্ডই ফুটবলপ্ৰেমীসকলক হতচকিত কৰিছে।
লিভাৰপুলৰ এনফিল্ড ফুটবল ষ্টেডিয়ামত বুধবাৰে ইংলেণ্ডৰ আগশাৰীৰৰ ক্লাব লিভাৰপুল আৰু স্পেইনৰ ৰিয়েল মাদ্ৰিদৰ মাজত কোৱাৰ্টাৰ ফাইনেলখনৰ চেকেণ্ড লেগ অনুষ্ঠিত হৈ যায়।
ইয়াৰ পূৰ্বৰ ফাৰ্ষ্ট লেগ মেচখনত ৰিয়েল মাদ্ৰিদ ৩-১ গ’লত আগবাঢ়ি আছিল।
যোৱাকালিৰ চেকেণ্ড লেগ মেচখন ড্ৰ হয়।
যাৰ ফলত ৰিয়েল মাদ্ৰিদ চেম্পিয়নছ লীগৰ চেমি ফাইনেলত প্ৰৱেশ কৰে।
চেমি ফাইনেলত ক্লাবটো মুখামুখি হ’ব ইংলেণ্ডৰে আন এটা ক্লাব চেলছিৰে।
এই বিজয়েৰে ৰিয়েল মাদ্ৰিদে ১৩ বাৰকৈ লীগটোৰ চেমি ফাইনেলত প্ৰৱেশ কৰি অভিলেখ সৃষ্টি কৰিলে।
মেচখনৰ মুখ্য আকৰ্ষণ আছিল সাম্প্ৰতিক সময়ৰ অন্যতম শ্ৰেষ্ঠ তাৰকা মহম্মদ ছালেহ।
ছালেহৰ ওপৰতে লিভাৰপুলৰ ভাগ্য নিৰ্ভয় কৰাৰ বিপৰীতে ৰিয়েল মাদ্ৰিদৰ বিজয়ত মুখ্য ভূমিকা লৈছিল তাৰকা ফুটবলাৰ লুকা মড্ৰিক, ভিনিচিয়াছ জুনিয়ৰ, কৰিম বেনজেমা ইত্যাদিয়ে।
আনহাতে, চেম্পিয়নছ লীগৰ কোৱাৰ্টাৰ ফাইনেল চেকেণ্ড লেগৰ আন এখন মেচত মানচেষ্টাৰ চিটিয়ে পৰাস্ত কৰে বৰোছিয়া ডৰ্টমুণ্ডক।
ইংলেণ্ডৰ ক্লাব মানচেষ্টাৰ চিটিয়ে জাৰ্মান ক্লাব ডৰ্টমুণ্ডক মেচখনত ২-১ ব্যৱধানত পৰাস্ত কৰে।
ইয়াৰ পূৰ্বৰ ফাৰ্ষ্ট লেগৰ মেচখনতো মানচেষ্টাৰ চিটি ২-১ ব্যৱধানত আগবাঢ়ি আছিল।
যাৰ ফলত দুয়োখন মেচ মিলাই ক্লাবটোৱে ৪-২ ব্যৱধানত বিজয়ী হৈ চেমি ফাইনেলত প্ৰৱেশ কৰে।
মানচেষ্টাৰ চিটিৰ হৈ গ’ল দুটা দিয়ে ৰিয়াদ মাহৰেজ আৰু ফিল ফ’ডেনে।
চেমি ফাইনেলত ক্লাবটো ফ্ৰান্সৰ ক্লাব পেৰিছ-চেইণ্ট জাৰ্মানৰে মুখামুখি হ’ব।
