ভাৰতবৰ্ষত কোভিড সংক্ৰমণৰ দ্বিতীয়টো ঢৌৰ ব্যাপকতা আৰু ভয়াৱহৰূপে সকলোৰে মাজত উদ্বিগ্নতাৰ সৃষ্টি কৰিছে। প্ৰথমটো ঢৌ প্ৰশমিত হোৱাৰ পাছত সংক্ৰমণ ৰোধ কৰাৰ বাবে অৱলম্বন কৰিবলগীয়া সাৱধানতাৰ ক্ষেত্ৰত অহা শিথিলতাই বৰ্তমান সংক্ৰমণ দ্ৰুতভাৱে বিয়পোৱাৰ মূল কাৰণ। সংবাদ মাধ্যমলৈ প্ৰেৰণ কৰা এক বিবৃতি এইদৰে কয় চিপিআই(এম) দলে।
দলটোৱে বিবৃতিটোত লগতে কয় যে কোভিড-১৯ মোকাবিলাৰ বাবে গঠন কৰা পিএম কেয়াৰচ ফাণ্ডত জমা হোৱা বিপুল পৰিমাণৰ ধন ব্যৱহাৰ কৰি স্বাস্থ্য সেৱাৰ আন্তঃগাঁথনি উন্নত আৰু সম্প্ৰসাৰিত কৰাৰ যি সুযোগ পাইছিল তাক কেন্দ্ৰীয় চৰকাৰে ব্যৱহাৰ নকৰিলে। পৰিণতিত হস্পিতালৰ বিচনা, অক্সিজেন যোগান, আই চি ইউ, ভেণ্টিলেটৰ আদিৰ ভয়ানক অভাৱে দেখা দিছে আৰু উপযুক্ত চিকিৎসা নোপোৱাকৈয়ে বহুলোকে কৰুণভাৱে মৃত্যু মুখত পৰাৰ চিত্ৰ প্ৰতিদিনে প্ৰকাশিত হৈছে।
কোভিড সংক্ৰমণ নিয়ন্ত্ৰণহীনভাৱে বৃদ্ধি পোৱাৰ পাছতো কুম্ভমেলাত লাখ লাখ লোকক সমৱেত হ’বলৈ অনুমতি দিয়া, প্ৰধানমন্ত্ৰীয়ে নিজে পশ্চিম বংগৰ বিশাল নিৰ্বাচনী সভাত অংশ লোৱা আদিৰ মাজেৰে বিজেপি চৰকাৰ আৰু দলীয় নেতৃবৃন্দৰ দায়িত্বজ্ঞানহীন আচৰণ প্ৰকট হৈছে বুলিও অভিযোগ কৰিছে দলটোৱে।
অসমতো কোভিড সংক্ৰমণ ক্ৰমান্বয়ে বৃদ্ধি পাব ধৰিছে বুলি কৈ দলটোৱনে সংক্ৰমণ ৰোধৰ বাবে দ্ৰুত আৰু কাৰ্যকৰী ব্যৱস্থা গ্ৰহণ কৰিবলৈ চৰকাৰক আহ্বান জনাইছে। “আন ৰাজ্যৰ তুলনাত আমাৰ ৰাজ্যখনত সংক্ৰমণ কম বুলি আত্মসন্তুষ্টি লভাটো পৰিশেষত অত্যন্ত ক্ষতিকাৰক হ’ব পাৰে।ৰাজ্যখনৰ খোদ স্বাস্থ্যমন্ত্ৰীগৰাকীয়ে ইতিমধ্যে একাধিকবাৰ এনে মন্তব্য কৰিছে। চৰকাৰৰ প্ৰৱক্তাসকলৰ এনে আচৰণে ল’বলগীয়া সাৱধানতাৰ ক্ষেত্ৰত জনসাধাৰণৰ মাজত শিথিলতা অনাৰ ব্যাপক আশংকা আছে।” কোভিড সংক্ৰান্তত চৰকাৰৰ দায়িত্বহীনতাৰ বিষয়ে এইদৰে কয় বামপন্থী দলটোৱে।
স্বাস্থ্যমন্ত্ৰীগৰাকীয়ে প্ৰকাশ কৰা তথ্য অনুসৰিয়ে ৰাজ্যখনত চিকিৎসা সেৱাৰ সুযোগ এতিয়াও যথেষ্ট সীমিত। সেয়ে কোভিদ সংক্ৰমণে ব্যাপকতা লাভ কৰাৰ আগতেই প্ৰয়োজনীয় পদক্ষেপ দ্ৰুততাৰে গ্ৰহণ কৰা উচিত। ৰাজহুৱা স্থানত মাস্ক পৰিধান আৰু শাৰীৰিক দূৰত্ব বৰ্তাই ৰখাটো কঠোৰভাৱে নিশ্চিত কৰা উচিত। ৰাজহুৱা স্থানসমূহ বীজাণুমুক্ত(sanitized) কৰাৰ বাবে চৰকাৰী সংস্থাসমূহে শীঘ্ৰে আৰু নিয়মিতভাৱে অভিযান চলাব লাগে বুলি মন্তব্য কৰিছে দলটোৱে।
সকলো প্ৰাপ্তবয়স্ক লোকক যাতে ভেকচিন দিয়া হয় তাক চৰকাৰে নিশ্চিত কৰিব লাগে বুলি উল্লেখ কৰি দলটোৱে অভিযোগ কৰি কয় যে ইতিমধ্যে প্ৰায় এসপ্তাহ ৰাজ্যখনৰ বিভিন্ন চিকিৎসালয়ত ভেকচিনৰ নাটনি হৈছিল।
ৰাজ্য চৰকাৰৰ অসতৰ্কতাৰ বাবে যাতে এনে ঘটনাৰ পুনৰাবৃত্তি নহয় তাৰ প্ৰতি চৰকাৰ সজাগ থকা উচিত। অসমত হস্পিতালৰ বিচনা, আইচিইউ,ভেণ্টিলেটৰ, অক্সিজেন যোগানৰ ব্যৱস্থা সম্প্ৰসাৰিত কৰাৰ বাবে জৰুৰী ব্যৱস্থা গ্ৰহণ কৰা প্ৰয়োজন যাতে যিকোনো পৰিস্থিতিৰ মোকাবিলা কৰিব পৰা যায়। হস্পিতালসমূহত পৰ্যাপ্ত সংখ্যক চিকিৎসক, নাৰ্চ, স্বাস্থ্যকৰ্মীৰ ব্যৱস্থা কৰা প্ৰয়োজন। ৰোগীসকললৈ পুষ্টিকৰ খাদ্যৰ যোগানো চৰকাৰে নিশ্চিত কৰা উচিত।দলটোৱে বিবৃতিটোত এইদৰে কয়।
