কৰ্মৰত অৱস্থাতেই শিৱসাগৰৰ পৰা অ’এনজিচিৰ তিনিগৰাকী বিষয়াক অপহৰণ কৰা হৈছে।
শিৱসাগৰৰ লাকুৱাৰ পৰা অপহৰণ কৰা হৈছে এই তিনি গৰাকী কৰ্মচাৰীক। মঙলবাৰে নিশা প্ৰায় ২ মান বজাত সংঘটিত হয় এই অপহৰণৰ ঘটনা।
জানিব পৰা মতে ৫/৬ জনীয়া অচিনাক্ত অস্ত্ৰধাৰী দল এটাই লাকুৱা তৈলক্ষেত্ৰৰ এটা ৰিগত কাম কৰি থকা সময়ত অপহৰণ কৰি নিয়ে অ’এনজিচিৰ এই কৰ্মচাৰী কেইজনক।
অপহৰণ কাণ্ডত অ’এনজিচিৰ এখন এম্বুলেঞ্চ ব্যৱহাৰ কৰিছিল বুলি জানিব পৰা গৈছে।
অপহৃত দুজন অ’এনজিচিৰ উৎপাদন বিভাগৰ কণিষ্ঠ অভিযন্তা আৰু এজন জুনিয়ৰ টেকনিচিয়ান বুলি অ’এনজিচিয়ে প্ৰকাশ কৰিছে।
অপহৃত তিনিজন মেহিনী মোহন গগৈ, অলকেশ শইকীয়া আৰু ৰিতুল শইকীয়া বুলি জানিব পৰা গৈছে।
অপহৰণকাণ্ডৰ লগত জড়িত অ’এনজিচিৰ এম্বুলেঞ্চ খন অসম নাগালেণ্ড সীমান্তৰ নিমনাগড়ৰ জংঘলৰ মাজৰ পৰা উদ্ধাৰ কৰা হৈছে।
ঘটনা সন্দৰ্ভত অ’এনজিচিয়ে লাকুৱা থানাত এক গোচৰ ৰুজু কৰিছে।
ঘটনাৰ পিছতেই তীব্ৰ চাঞ্চল্যৰ সৃষ্টি হৈছে অ’এনজিচিৰ ভিতৰচ’ৰাত। কটকটীয়া নিৰাপত্তা গঢ়ি তোলা হৈছে অ’এনজিচি শিৱসাগৰস্থিত কাৰ্যালয়ত।