মাদ্ৰাছ হাইকোৰ্টৰ ভৎসৰ্নাৰ সন্মুখীন হৈছে নিৰ্বাচন আয়োগ। পশ্চিমবংগকে ধৰি তিনিখন ৰাজ্য আৰু এখন কেন্দ্ৰীয় শাসিত অঞ্চলত ভোটগ্ৰহণ অনুষ্ঠিত কৰিছে নিৰ্বাচন আয়োগে।
এই সময়তে কৰ’নাৰ সংক্ৰমণ দ্ৰুত গতিত উৰ্ধমুখী হৈ পৰে। নিৰ্বাচনী প্ৰচাৰত ৰাজনৈতিক দলসমূহে যিদৰে কৰ’না বিধিক উপেক্ষা কৰিলে তাৰ বাবেই সংক্ৰমণ নিয়ন্ত্ৰণহীন হৈ পৰিছে।
সোমবাৰে মাদ্ৰাছ হাইকোৰ্টৰ মুখ্য ন্যায়াধীশ সঞ্জীৱ বন্দোপাধ্যায়ৰ পৰ্যবেক্ষণত কোৱা হয় যে নিৰ্বাচন আয়োগৰ বাবেই কৰ’নাৰ দ্বিতীয় লহৰ দেশত বিয়পি পৰিছে।
নিৰ্বাচন আয়োগক ভৎসৰ্না কৰি লগতে কোৱা হয় যে আপোনালোকৰ বিৰুদ্ধে হত্যাৰ গোচৰ তৰা উচিত। তদুপৰি, দৃষ্টান্তমূলক সতৰ্কবাণীত আদালতখনে নিৰ্বাচন আয়োগক জনাই দিয়ে যে এতিয়াই পৰিস্থিতিত পদক্ষেপ গ্ৰহণ নকৰিলে ২মে’ৰ ভোটগণনা বন্ধ কৰি দিয়া হ’ব।
আজি আদালতখনে কয় যে নিৰ্বাচন আয়োগে তৎকালীনভাৱে কৰ’না বিধি বলবৎ কৰি পদক্ষেপ গ্ৰহণ কৰিব লাগিব। আয়োগে সেয়া নকৰিলে ভোটগণনা বন্ধ কৰি দিয়া হ’ব বুলি সাৱধান কৰি দিয়ে আদালতখনে।
লগতে ৩০ এপ্ৰিলৰ ভিতৰত নিৰ্বাচন আয়োগে ভোটগণনাৰ বাবে কি কি পদক্ষেপ লৈছে সেয়া আদালতক জনাব লাগিব।
মাদ্ৰাছ হাইকোৰ্টে নিৰ্বাচন আয়োগক সকীয়াই দি কয়, ’’যেতিয়া ৰাজনৈতিক সভাসমূহ চলি আছিল, তেতিয়া আপোনালোকে আপোনালোকে অন্য গ্ৰহত আছিল নেকি?’’
আদালতে লগতে কয়, ‘’জনসাধাৰণ স্বাস্থ্য আটাইতকৈ বেছি গুৰুত্বপূৰ্ণ বিষয়। দুখৰ বিষয় যে সাংবিধানিক সংস্থাক এই কথাটো মনত পেলাই দিবলগীয়া হৈছে। জনাধাৰণ বাচি থাকিলেহে তেওঁলোকে তেওঁলোকৰ অধিকাৰ উপভোগ কৰিব পাৰিব। এতিয়া জীয়াই থকাৰ যুঁজ চলিছে। বাকী সকলো পাছৰ কথা।‘
