ছ’চিয়েল মিডিয়াৰ অন্যতম মাধ্যম ফেচবুকে বহুতৰে জীৱনলৈ কাল অমানিশা নমাই আনিছে। ফেচবুকৰ জৰিয়তে হোৱা বন্ধুত্বৰ বাবেই অসমৰ এজন লোকে এতিয়া কাৰাগাৰৰ বন্ধ কুঠৰীত জীৱন পাৰ কৰিবলগীয়া হ’ব।
অসমৰ কৰিমগঞ্জৰ বাসিন্দা বাবলু শুক্লবৈদ্য।২০১৯ চনত বাবলুৰ সৈতে ফেচবুকৰ জৰিয়তে পৰিচয় হৈছিল ত্ৰিপুৰাৰ আগৰতলা নিবাসী এগৰাকী বিবাহ বিচ্ছেদিত মহিলাৰ।
এই পৰিচয় সূত্ৰেই বাবলু এটা সময়ত মহিলাগৰাকীৰ প্ৰেমত পৰিছিল। ফেচবুকত পৰিচয় হোৱাৰ কিছুদিন পিছতে বাবলুৱে আগৰতলালৈ গৈ মহিলাগৰাকীৰ ফ্লেটত উপস্থিত হৈছিল।
বাবলুৱে মহিলাগৰাকীৰ সৈতে বিধি বৰ্হিভূত সম্পৰ্ক স্থাপন কৰিব বিচৰাত মহিলাগৰাকীয়ে বাধা দিছিল আৰু বাবলুক খেদি পঠিয়াইছিল।
এই কথাতে ক্ষুদ্ধ হৈ পৰিছিল বাবলু।প্ৰেম প্ৰত্যাখান কৰা মহিলাগৰাকীৰ ওপৰত প্ৰতিশোধ ল’বলৈ বাবলুৱে সুযোগ বিচাৰি আছিল আৰু ২০১৯ চনৰ ২৯ মাৰ্চৰ দিনা তেওঁ পুনৰ আগৰতলালৈ গৈ মহিলাগৰাকীক লগ কৰিছিল।
বাবলুৱে মহিলাগৰাকীক চোকা অস্ত্ৰৰে আঘাত কৰিছিল। এই কামত বাধা দিয়া বাবে বাবলুৱে মহিলাগৰাকীৰ আঠ বছৰীয়া পুত্ৰ সন্তানকো বাবলুৱে আক্ৰমণ কৰে।
ফলত মাতৃ-পুত্ৰ তেজেৰে লুতুৰী-পুতৰী হৈ মজিয়াত বাগৰি পৰে।বাবলুৱে দুয়োৰে মৃত্যু ঘটা বুলি ভাবি সেই ঠাইৰ পৰা আঁতৰি যায় যদিও প্ৰায় ডেৰ ঘণ্টাৰ পিছত মহিলাগৰাকীৰ জ্ঞান ঘূৰি অহাত সহায়ৰ বাবে চিঞৰে।ওচৰ-চুবুৰীয়াই চিঞৰ শুনি তাত উপস্থিত হয় আৰু মাতৃ-পুত্ৰৰ চিকিৎসাৰ ব্যৱস্থা কৰে।
পিছত মহিলাগৰাকীৰ অভিযোগৰ ভিত্তিত আৰক্ষীয়ে অসমৰ বাবলুক গ্ৰেপ্তাৰ কৰে।
আজি ত্ৰিপুৰাৰ এখন আদালতে বাবুলক হত্যাৰ অপচেষ্টা চলোৱাৰ অভিযোগত যাবজ্জীৱন কাৰাদণ্ড বিহিছে।
